MALIANA, 28 setembru 2023 (TATOLI)-Sub Komisaun Reguladora Arte-marsiál (KRAM) Munisípiu Bobonaro, identifika kampu ezersísiu (ranting) Organizasaun Arte-Marsiál (OAM) ne’ebé eziste iha munisípiu Bobonaro barak latuir regra ne’ebé estabelese ona.
Prezidente Sub-KRAM Munisípiu Bobonaro, José Ramos, informa durante ne’e KRAM fiskaliza no identifika ona fatin ezersísiu OAM hosi Ikatan Kera Sakti (IKS) hamutuk 76, Persaudaraan Setia Hati Terrate (PSHT) 74, Kmanek Oan Rai Klaran (KORK) 47 no Kungfu Master.
Fatin hirak-ne’e hala’o ona iha postu administrativu Atabae, Balibó, Cailaco, Maliana, Bobonaro no falta de’it postu administrativu Lolotoe.
Notísia relevante: Autoridade Bobonaro apresia GAM hamoos símbolu iha kapitál Maliana
“Kuaze buat barak mak sira seidauk bele halo di’ak, liuliu iha ranting, sira seidauk tuir kritéria barak loos, ezemplu iha ranting sira tuir lei hateten, tenke iha uma-oan ida, sede kiik-oan ida, fatin troka ba feto no mane, hariis-fatin tenke moos, iha fatin públiku, maibé barak mak seidauk tuir kritéria ne’e,” nia informa ba jornalista sira, iha Maliana, kuarta ne’e.
Ligá ho kestáun ne’e, Sub-KRAM sei xamada ba OAM sira hotu no bainhira la kumpre sei suspende sira-nia atividade treina ka kampu ba ezersísiu ne’e.
“Kuaze hotu-hotu seidauk preparadu ho di’ak, tanba ne’e liuhosi fiskalizasaun ita husu ba sira, iha tempu badak kompleta tiha sasán sira-ne’ebé mak KRAM husu, ligadu ho sasán sira-ne’ebé establese iha ranting,” Ramos apela.
Iha semana ne’e Sub-KRAM mós sei ba postu administrativu Lolotoe hodi halo fiskalizasaun ba atividade OAM inklui kondisaun fatin formasaun.
“Tuir lei tenke iha fatin públiku, subar labele, ne’e kaer kona, ita sei investiga kuandu kontra lei, ita sei fó sansaun kiik liu mak $200 to’o $2000,”Prezidente Sub-KRAM Bobonaro ne’e fó hanoin.
Sub-KRAM mós sei servisu hamutuk ho komandu Polísia Bobonaro atu detein membru OAM ne’ebé utiliza atributu arte-marsiál iha fatin públiku.
KRAM hola medida ne’e tanba OAM sira livre utiliza atributu simplesmente bele akontese provakasaun to’o hamosu konfrontu.
“Ita atu evita, sé mak tau, kaer, ne’e lei mak hatete, sé o lakohi koopera ne’e tuir lei númeru 5/2017 artigu 32 ne’e hatete o-nia devér,” nia dehan.
Sub-KRAM Munisípiu Bobonaro ne’e apela bA OAM sira labele utiliza atributu iha fatin públiku, tanba tuir lei só bele uza de’it iha kampu ezersísiu, maibé sai hosi uma no fila hosi fatin formasaum tenke tau iha pasta laran.
Notísia relevante: IKS-PTL husu membru hotu hakruk ba segunda diretiva KRAM
Jornalista: Sérgio da Cruz
Editór: Evaristo Soares Martins
