IKS-PTL husu membru hotu hakruk ba segunda diretiva KRAM
DILI, 25 agostu 2023 (TATOLI) – Prezidente Organizasaun Arte Marsiál (OAM) Silvestre Sufa husu ba membru hotu atu kumpre saida mak ko’alia iha segunda diretiva Komisaun Reguladora Arte Marsial (KRAM) liuliu labele hatais atributu iha fatin públiku bainhira la iha relasaun ho atividade organizasaun nian.
“Buat hotu ko’alia ona iha segunda diretiva KRAM ninian, husu membru hotu atu kumpre, labele hatais atributu iha fatin públiku bainhira la iha relasaun ho atividade organizasaun nian, labele utiliza farda ba merkadu no super-merkadu, se mak hatais mak KRAM hetan, nia rasik mak selu multa la’os organizasaun mak selu, se nia la selu prosesu nia ba oin”, Silvestre dehan ba jornalista-sira iha salaun Komisaun Nasionál Eleisaun (CNE-sigla portugés), sesta ne’e.
Tuir segunda diretiva ne’ebé fó sai hosi KRAM katak bainhira membru OAM ne’ebé de’it mak hatais farda iha fatin públiku maibé la iha relasaun ho atividade organizasaun nian mak sei selu multa ho osan hamutuk $200- resin.
“IKS-PTL nia membru sira labele hatais farda iha fatin públiku, hatais farda tenke tuir nia fatin, so ba fatin treinamentu mak hatais, fila hasai kedan, se imi osan iha hatais ba pois mak ba selu iha Estadu”, nia dehan.
Tuir dadus ne’ebé iha, totál membru IKS-PTL iha teritóriu nasionál hamutuk rihun 23- resin.
Jornalista: Hortencio Sanchez
Editór : Zezito Silva
