iklan

MUNISÍPIU, VIKEKE

Uma-kain 20 resin iha suku Caraubalu Viqueque konsumu bee-mota

Uma-kain 20 resin iha suku Caraubalu Viqueque konsumu bee-mota

Suku Caraubalu, Viqueque. Imajen Tatoli/Vitorino Lopes da Costa

VIQUEQUE, 20 outubru 2023 (TATOLI)Xefe suku Caraubalu, postu administrativu Viqueque Vila, munisípiu Viqueque, João Pinto, informa, abitante 53 hosi uma-kain 20 resin iha área Feto Fuan Bela Beti, aldeia Has-Abut iha suku Caraubalu durante ne’e konsumu bee-mota.

“Sira konsumu bee mota tanba kanalizasaun bee-moos seidauk to’o iha área ne’ebá,” João Pinto, hateten ba Agência Tatoli, iha aldeia Has-Abut, sesta ne’e.

Uluk kanalizasaun bee-moos to’o iha área Has-Abut, maibé mota tun hodi estraga fasilidade kanu kanalizasaun no ikus mai laiha manutensaun.

“Entaun agora ita-nia abitante sira hasoru difikuldade ba bee-moos nune’e loron ba loron abitante sira depende de’it ba bee mota hodi konsumu no uza haris,” nia hato’o.

Notísia relevante : Abitante suku Uaimori 1.200 resin konsumu bee mota

Autoridade komunitáriu ne’e dehan, konsumu bee-mota bele fó impaktu ladi’ak ba ema-nia saúde, maibé tanba bee-moos laiha obrigadu tenke kuru bee iha mota. Bainhira tempu udan no mota tun abitante sira labele kuru bee.

“Abitante sira pasiénsia konsumu de’it no uma-kain 20 laiha sentina tanba laiha bee. Tanba ne’e, ha’u tau ona prioridade ba kondisaun iha área Has-Abut atubele buka solusaun,” nia realsa

Suku Caraubalu kompostu hosi aldeia hitu ho populasaun hamutuk 6.594 (sensu populasauj 2015), hosi uma-kain 1.000 resin.

Maski nune’e, uma-kain hotu iha suku ne’e asesu ona bee-moos, falta uma-kain 20 mak seidauk asesu.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!