VIQUEQUE, 23 outubru 2023 (TATOLI)—Autoridade Protesaun Sivil (APC) munisípiu Viqueque, segunda ne’e, apoia pakote emerjénsia ba vítima inséndiu iha aldeia Baha Foun, suku Uma-Ki’ik, postu administrativu Viqueque Vila, munisípiu Viqueuqe.
Ahi-han uma iha domingu (22/10) maizumenu tuku 05:15 dadeeer, hodi rezulta sasán uma laran balun la konsege salva.
“Ami apoia ona pakote emerjénsia ba vítima,” Adjunto APC Viqueque, Cirilio Soares Gomes, hateten ba Agência Tatoli, iha postu Viqueque Vila.
Inséndiu uma ne’e akontese ba família Fernando Batista, ho membru família hamutuk na’in-hitu, nune’e daudaun ne’e vítiva sira evakua ona ba família sira-nia uma.
Maski nune’e, APC seidauk identifika kauza inséndiu tanba uma-na’in rasik mós la hatene kronolojia akontesementu.
“Ha’u husu ba vítima rasik la hatene motivu hosi akontesimentu hanesan tentasaun ida, motivu ba krime mós laiha no eletrisidade móslaiha,” nia relata.
Notísia relevante : APC Viqueque identifika sidadaun afetadu dezastre naturál fa’an materiál konstrusaun
Insidente ne’e rezulta ahi han uma ida, dapur ida inklui sasán uma laran hanesan foos karon haat, bikan, kanuru, osan $70 no roupa balun.
Nune’e, APC Viqueque halo verifikasaun no apoia pakote emerjénsia ida kompostu hosi foos, masi-midar, kafé, supermi, sardiña, mina no sasán dapur.
Jornalista : Vitorino Lopes da Costa
Editora : Julia Chatarina
