VIQUEQUE, 09 outubru 2023 (TATOLI)—Autoridade Protesaun Sivíl (APC, sigla portugés) identifika sidadaun afetadu dezastre naturál ho inisiál J, ne’ebé antes ne’e hetan materiál konstrusaun, fa’an fali sasán ne’ebé nia hetan ba ema seluk.
“Ami konsege identifika sidadaun ida-ne’ebé uluk afeta ba dezastre naturál, foin lalais Governu distribui materiál konstrusaun uma ba vítima sira, maibé ami simu informasaun hosi Ofisiál Polísia Suku (OPS) iha suku Uma Kraik, katak benefisiáriu ida fa’an sasán ne’ebé nia simu, nune’e ami hamutuk ho Polísia Nasionál Timor-Leste (PNTL) Eskuadra Viqueque Vila halo apreensaun sasán hanesan besi hamutuk 50,” Adjuntu APC Viqueque, Cirílio Soares Gomes, informa ba Agência Tatoli, iha postu Viqueque Vila, segunda ne’e.
APC no PNTL Eskuadra Viqueque Vila halo identifikasaun iha aldeia Fatuhadan, suku Uma-Uain Kraik, postu administrativu Viqueque Vila, maizumenus tuku 09:00 dadeer.
Notísia relevante : Uma-kain 460 seidauk hetan apoiu materiál hosi APC no 690 konkluidu
Nune’e, PNTL Eskuadra Viqueque Vila sei loke prosesu investigasaun ba sidadaun ne’ebé fa’an materiál konstrusaun no hafoin ne’e sei entrega ba Ministériu Públiku.
Tuir Cirílio Soares, matadalan APC bandu benefisiáriu atu fó empresta no fa’an materiál sira ne’ebé Governu distribui ona ba ema seluk. Hafoin simu materiál, liu fulan-tolu APC sei bá haree vítima sira uza materiál halo uma ka lae, to’o dala-tolu maka vítima sira seidauk halo uma mak sei loke fali prosesu ba vítima sira-ne’ebé simu materiál.
“Ohin halo verifikasaun ba benefisiáriu ne’e nia dehan fó empresta. maibé iha matalan la autoriza atu fó empresta ba ema. Nune’e ami entrega ona ba PNTL hodi prosesa kazu ne’e,” nia akresenta.
Jornalista : Vitorino Lopes da Costa
Editora : Julia Chatarina
