DILI, 26 setembru 2023 (TATOLI) – Porta-vós Autoridade Protesaun Sivil (APC, sigla portugés), João de Sousa Filipe, dehan APC apoiu ona materiál konstrusaun no osan $1,500 ba uma-kain afetadu ba dezastre natural hamutuk 690 no 460 mak ladauk hetan.
“Ita rejista hosi 2022 to’o marsu 2023, iha komunidade uma-kain 2.373 mak afetadu ba dezastre naturál, hosi uma-kain sira ne’e, ita halo verifikasaun no aprova uma-kain sira ne’ebé simu ona materiál konstrusaun mak hamutuk 1.150, hosi dadus sira-ne’e iha uma-kain 690 mak ita distribui ona materiál konstrusaun ba sira no sira ne’ebé seidauk responde mak 460”, João de Sousa Filipe hateten ba TATOLI iha nia kna’ar fatin APC Caicoli, tersa ne’e.
Nia dehan, iha uma-kain 460 ne’ebé seidauk hetan apoiu maibé APC nasionál koorderna ona ho Komandante Operasaun APC munisípiu sira atu koalia ho Autoridade Postu Administrativu inklui Xefe Suku sira, nune’e bele distribui iha tempu besik.
“Ami kondena ona ho Komandante Autoridade Protesaun Sivil munisípiu para sira bele koalia ho Administradór Postu Administrativu, Xefe Suku sira atu kontinua distribui materiál konstrusaun ba hirak ne’ebé ami seidauk responde ho núemru 460”, nia adianta.
APC kompromete sei la taka matan ba komunidade ne’ebé hetan dezastre naturál
Porta-vós APC, João de Sousa Filipe, iha biban ne’e mós hateten, sei kontinua fó apoiu ba vítima dezastre naturál liuliu ba hirak ne’ebé mak uma estraga naton no estraga totál.
“Bá komunidade sira ne’ebé afeta ba dezastre naturál hahú hosi fulan abríl to’o agora, APC sei la taka matan no sei kontinua apoiu materiál konstrusaun”, nia dehan.
“Ita-nia ekipa agora dadaun sei iha hela terenu hodi kontinua halo levantamentu, kuandu halo verifikasaun uma hira mak hetan estragu kaman no uma ne’ebé mak hetan estraga total, ita tau ona iha baze dadus, ita aprova, depois ita sei tau ajenda hodi kontinua halo distribuisaun”, nia adianta.
Jornalista: Natalino Costa
Editór : Zezito Silva
