DILI, 23 outubru 2023 (TATOLI) – Ministériu Edukasaun (ME) liuhusi Diresaun Nasionál Dezenvolvimentu Parke Eskolár hasai ona karta sirkulár hodi husu ba grupu komunitáriu sira atu aselera Projetu Konstrusaun no Reabilitasaun Infraestrutura Edukativa (PKRIE) hamutuk 50 iha novembru.
Diretór Nasionál Dezenvolvimentu Parke Eskolár, Hélio Lopes, afirma PKRIE 2021 ne’ebé ho totál 202 ne’e falta de’it projetu 50 maka besik atu finaliza. Projetu sira ne’e maioria iha área remota ne’ebé difísil atu fó asesu bá transporte hodi distribui materiál konstrusaun.
Ministériu Edukasaun nu’udar na’in ba projetu akompaña nafatin prosesu reabilitasaun ba projetu sira ne’ebé maka grupu komunitáriu sira ezekuta no husu ba atu aselera projetu sira ne’e iha tempu besik, tanba obra sira ne’e kuaze besik ona tinan rua.
“Ami fó ona karta ba grupu komunitária sira hotu ne’ebé maka seidauk finaliza sira-ninia responsabilidade ba PKRIE 50 ne’e atu konklui iha novembru, nune’e ita bele kontinua fali ho projetu foun 114 iha 2024”, Hélio informa ba Tatoli iha Vila Verde.
Ba projetu 114 ne’ebé asina ona iha 2023 no konstrui iha tinan oin ne’e daudaun tama ona iha levantamentu fundu ba primeiru adiantamentu no Ministériu Edukasaun sei kontinua iha tinan oin.
“Ba projetu 114 ne’e ha’u promete sei halo esforsu atu ezekuta ho di’ak mezmu atrazu, maibé bele garante nia kualidade”, nia realsa.
Ba projetu 50 ne’e barak maka atinje ona 75% no iha eskola balun maka foin atinje besik 50% mak eskola bázika filiál Uadaboru ne’ebé lokaliza iha foho Matebian. Tanba ne’e, diresaun hamutuk ho ekipa téknika sira sei halo esforsu atu finaliza projetu sira ne’e iha tempu ne’ebé determina ona.
Rekorde katak Governu anteriór aloka millaun $20 ba konstrusaun no reabilitasaun ba estabelesimentu edukativu 202 ho sala-de-aula hamutuk 657.
Notísia relevante: Konklui ona PKRIE 29 iha munisípiu 10
Jornalista: Tomé Amado
Editora: Maria Auxiliadora
