DILI, 23 outubru 2023 (TATOLI) – Diretór Klínika iha Hospitál Nasionál Guido Valadares (HNGV), Marcelino Correia, informa pasiente hamutuk 50 mak iha ona passaporte atu ba halo tratamentu saúde iha rai-liur.
“Pasiente 50 ne’ebé mak kaderneta passaporte iha ona ne’e mai husi lista pasiente 140 ne’ebé mak durante passaporte la iha, entaun ida-ne’e mak sei ba halo tratamentu saúde iha rai liur”, Marcelino Correia dehan iha nia kna’ar fatin HNGV, ohin.
Nia husu ba pasiente sira atu HNGV atu prosesa sira nia pedidu moras ba Ministériu Saúde liuhosi dirasaun ospitalár atu kompleta dokumentu hafoin bele prosesa ba halo tratamentu.
Iha sorin seluk, Diretór Nasionál Servisu Apoiu Ospitalár no Emerjénsia iha Ministériu Saúde, Nilton do Carmo da Silva, hateten pasiente hamutuk 23 preparadu no semana oin sei ba halo tratamentu saúde iha rai-liur.
“Semana ida-ne’e ni’an por volta 23 pasiente, husi 23 ne’e mak agora ami prosesa hela no balun sei aranka iha domingu no balun sei aranka iha semana oin, depende ba ospitál rai-liur ne’eba”, Nilton do Carmo da Silva informa.
Nia hateten, husi pasiente na’in-23 maioria moras kankru no fuan, entaun pasiente hirak ne’e sei ba hala’o tratamentu iha ospitál tolu ne’ebé Governu asina akordu ba.
Nia haktuir, kona-ba desizaun transfere pasiente ba ospitál tolu ne’e, husi junta médika, foti bazeia ba kritériu no rekerimentu ne’ebé maka junta médiku uza hodi avalia moras antes transfere.
“Dokumentu sira kompleta durante ne’e mak passaporte no dokumentu sira seluk ne’ebé seidauk kompleta sira kompleta depois mak mai iha ne’e no parte tékniku verifika lalais hodi prosesa”, nia relata.
Nia afirma, pasiente ne’ebé hala’o hela tratamentu iha rai-liur hamutuk 56, husi númeru ne’e, pasiente na’in-40 iha Indonézia, 15 iha Singapura no na’in-ida iha Malázia, iha semana ne’e pasiente na’in-hitu mak Ministériu Saúde transfere uluk ona ba rai liur.
Tuir dadus, hahú husi janeiru to’o setembru 2023, pasiente ne’ebé hala’o tratamentu iha rai liur hamutuk 195, husi númeru ne’e, pasiente hamutuk 187 moris no pasiente na’in-ualu mak mate.
Notísia relevante : Pasiente 140 nia moras aumenta tanba passaporte
Jornalista :Felicidade Ximenes
Editór : Zezito Silva
