BAUCAU, 23 outubru 2023 (TATOLI) – Postu admistrativu Baucau vila, munisípiu Baucau hahú implementa Programa Mão de Obra Postu Admistrativu faze daruak.
Administradór Postu Admistrativu Baucau Vila, Isencinio António da Silva, esplika, programa refere kontinua ba faze daruak hafoin relatóriu faze daruak aprova hosi administrasaun munisipál no deside alokasaun orsamentu ba faze daruak ne’ebé traballador sira komesa serbisu iha inísiu fulan-outubru ne’e.
“Ita halo ona pagamentu ba suku rua tanba finaliza ona no tuir planu meadu fulan-novembru ita finaliza ona,” Administradór Postu Admistrativu Baucau vila hateten iha Vila nova, segunda ne’e.
Suku rua ne’ebé finaliza uluk mak suku Caibada no Buruma enkuantu suku sia seluk sei iha faze implementasaun no tuir planu bainhira finaliza parte administrasaun postu sei direita halo pagamentu iha suku.
PMOPA faze daruak implementa iha suku 11 ho durasaun serbisu loron-10 ho tótal traballadór informál iha kada grupu nain-20 ne’ebé implementa atividade hanesan reparasaun estrada, limpeza jerál, kuda ai-oan inklui konserva bee-matan.
Postu Baucau vila hetan alokasaun orsamentu ba PMOPA tinan-2023 hamutuk rihun $100 ne’ebé aloka ba kustu adminitrasaun pursentu lima no kustu operasionál pursentu 95 ho totál traballadór hamutuk 931.
Entretantu munisípiu Baucau iha tinan-2023 hetan alokasaun orsamentu ba PMOPA hamutuk rihun-600 ne’ebé fahe ba postu administrativu neen kompostu Baguia, Baucau vila, Laga, Quelicai, Venilale no Vemase ho alokasaun pursentu lima ba kustu administasaun no kustu atividade pursentu 95 ne’ebé envolve tótal traballadór 5.588.
Jornalista : Natalino Belo
Editór : Rafael Ximenes de A. Belo
