DILI, 23 outubru 2023 (TATOLI)—Governu liuhosi Sekretaria Estadu Formasaun Profisionál Empregu (SEFOPE) iha intensaun kria lei espésiku regula traballu doméstiku (asistente uma-kain) tanba konsidera traballadór ne’e iha risku liu kompara hosi traballadór sira seluk.
“Traballu doméstika ne’e sensitivu liu no diferensa oitoan hosi ho traballadór sira ne’ebé serbisu iha loja no kompañia sira. Bainhira lei espesífiku ne’e aprova ona hosi Konsellu Ministru maka ami bele utiliza hodi regulariza ita-nia traballadór doméstiku sira,” Diretór Nasionál Relasaun Traballu SEFOPE, Ângelo dos Santos Veloso, hateten, liuhosi programa entrevista eskluziva live streaming Agência Tatoli, I.P, iha estúdiu Farol, segunda ne’e.
SEFOPE antes ne’e iha mandatu V Governu, submete ona ezbosu lejizlasaun atu regula traballu doméstiku ba Ministériu Koordenadór Asuntu Ekonómiku (MKAE) hodi haree no submete ba Konsellu Ministru tanba bazeia ba Lei Traballu iha artigu balun fó dalan atu hamosu dekretu-lei espesífiku regula traballu doméstiku.
“Governu daudaun utiliza rejime laborál númeru 4/2012 hodi regula traballadór, iha artigu 2 hateten katak sei kria lei espesífiku traballu doméstiku nian ne’ebé hanesan téknikamente ami prepara ona maibé seidauk aprova hosi Konsellu Ministru,” nia akresenta.
Notísia relevante : SEFOPE submete ona ezbosu lejizlasaun regula traballu doméstiku ba MKAE
Diretór subliña, esbosu lei ne’e ninia kontiúdu laiha diferensa ho Lei Traballu, maibé iha artigu balun mak fó espesiál liu tanba durante ne’e Lei Traballu seidauk iha artigu espesífiku ida ne’ebé ko’alia kona-ba serbisu doméstiku ninian.
“Entaun dalaruma traballadór doméstiku sira ne’e lakon direitu lubuk ida, hanesan direitu ba férias (annual lift), seguransa sosiál, no remunerasaun balun. Klaru katak ko’alia kona-ba serbisu iha parte rua de’it, empregadór no traballadór, entaun iha ne’ebá mós direitu no dever hakerek klaru,” nia tenik.
Diresaun Jerál Relasaun Traballu SEFOPE, ninia serbisu maka promove no halo prevensaun ba disputa laborál ne’ebé mak akontese iha territóriu Timor-Leste, liu-liu traballadór no empregadór sira.
Jornalista : Antónia Gusmão
Editora : Julia Chatarina
