VIQUEQUE, 24 outubru 2023 (TATOLI)–Diretór Servisu Agrikultura Viqueque, Fernando Joaquim, prefere Ministériu Agrikultura, Pekuária, Peska no Floresta (MAPPF) halo manutensaun ba tratór boot 26 ne’ebé destaka iha munisípiu Viqueque.
“Ministériu daudaun ne’e loke ona konkursu manutensaun ba tratór boot ne’ebé ha’u hanoin se bele ministériu bele halo hotu manutensaun ba tratór boot 26. Bainhira halo manutensaun boot, ha’u sente di’ak ona tanba ita bele ajuda ona povu agrikultór,” Diretór hateten ba Agência Tatoli, iha postu Viqueque Vila, tersa ne’e.
Notísia relevante : MAPPF sei halo levantamentu ba tratór boot iha Viqueque
Mekániku sira hosi MAPPF foin lalais ne’e halo ona verifikasaun no levantamentu dadus tratór boot sira iha munisípiu Viqueque.
“Maibé la hatene sira atu hadi’a lai hira no hira maka labele ona halo manutensaun,” nia akresenta.
Tuir dadus daudaun iha tratór a’at naton 14, a’at todan 12 no kondisaun di’ak haat, maibé hasoru difikuldade tanba oli 40 sei iha bidon ida no oli 140 maka laiha.
“Abitante sira hosi Uma-Uain Kraik foin lalais halo ona karta deklarasaun atu sira sosa oli hodi fila rai. Karta deklarasaun ne’e ha’u submete ona ba nasionál hodi hasai despaixu ruma, maibé seidauk iha resposta,” nia haktuir.
Nia dehan, munisípiu Viqueque iha agrikultór 100 resin maka submente ona proposta fila rai ba Servisu Agrikultura, maibé seidauk fó resposta tanba kondisaun tratór a’at.
“To’o agora ami seidauk bele resposta tanba ita-nia tratór ho kondisaun a’at no balun laiha oli. Karik Governu tempu badak nia laran halo ona manutensaun, ha’u hanoin ami bele responde ita-nia agrikultór sira-nia pedidu,” nia tenik.
Jornalista : Vitorino Lopes da Costa
Editora : Julia Chatarina
