DILI, 24 outubru 2023 (TATOLI)– Empreza importadór Perissos Victoria,Lda, hahú fa’an ona foos subsídiu governu ho marka “Amor da Familia” saka kilograma 20 ho folin $10 no saka kilograma 25 ho presu $12,50.
“Perissos Victoria,Lda nu’udar parseiru governu nia sempre pronto sai fasilitatór no hakarak implementa programa foos subsídiu Governu. Nune’e Konsumidór sira agora bele sosa foos ho marka amor de familia saka 20kg folin $10 no saka 25kg ho presu $11,50 iha loja ne’ebé besik ita boot sira”, refere nota ne’ebé Agência TATOLI asesu iha portál empreza Perissos, tersa ne’e.
Empreza ne’e fa’an baze akordu ne’ebé selebra ho Governu hodi implementa intervensaun temporária ba estabilizasaun folin foos iha merkadu.
Governu halo akordu ne’e ho objetivu mak atu asegura presu foos importadu, ne’ebé fa’an iha armazein empreza nasionál nian sira ne’ebé fa’an kuantidade boot, hodi fiksa ho montante másimu $12 ba kada saku ka parsela 25Kg, atu permite fa’an-rahun foos ho folin másimu 0,50 kada kilograma.
Hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór dolar amerikanu US$ 5 kada saku ka parsela 25 Kg, ne’ebé korresponde ho sentavu 20 ba kada kilograma foos nian.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei n. 76/2023, loron 29 fulan-setembru, ne’ebé estabelese medida ida-ne’e.
Empreza lima ne’ebé ohin formaliza ona akordu ho Governu maka, Perissos Victoria Lda., Loja Creative Furak Lda., Lisun Importação no Exportação Lda., Jusibel Unipessoal Lda no Alfa Dili Unipessoal Lda.
Loja Creative Furak seidauk implementa
Iha fatin ketak, Maske halo ona akordu ho governu, maibé Empreza importadór Loja Creative Furak Lda, seidauk aplika tanba governu seidauk halo pagamentu subsídiu ba sira.
“To’o agora ami seidauk hatene oinsá mekanismu implementasaun subsídiu husi Governu tanba ami seidauk iha akordu fixu ida kona-ba pagamentu, nune’e mak ami hein hela”, informa Asistente Empreza importadór Loja Kreative Furak Lda, Yaty Zaka, ba Agência TATOLI.
Seidauk implementa tanba, nia esplika iha akordu ne’ebé Governu ho empreza sira asina sei jerál hela no nia kontéudu ne’e hanesan públika ona iha Jornal Repúblika.
“Iha MOU ne’e subsidiu sei la’o durante fulan tolu. Iha MOU dehan subsídiu Governu fó $0.20 ba foos kada kilograma. Empreza bele faan 2.500 tonelada ba kada fulan”, nia afirma.
Negosiante sosa ona iha Perissos
Entertantu, Negosiante foos husi munisipiu Lautém, Silvestre Cristovão, hatete sira nia-parte sosa ona foos ho marka amor de família iha perissos ho nia presu hanesan ho akordu ne’ebé halo ona ho governu.
“Ha’u sosa ona foos iha perissos ho marka amor de familia saka 20kg ho folin $10 no saka 25kg ho presu $11,50, nune’e ha’u sosa saka 100, ne’ebé perissos hatun fali foos saka 10kg ho folin $9. Nune’e Ha’u atu ba fa’an fali iha munisípiu Lautem ho folin bele aumenta $1 to’o $1,50”, nia afirma.
Iha biban hanesan, Vendedór husi munisÍpiu Ermera, Marta Lopes, reforsa nia parte sosa foos 20kg ho kuatidade saka 100 ho folin kada saka $9.
“Ami sosa iha Perissos ne’ebé ha’u sei ba faan tutan fali foos ho marka amor de família husi subsídiu Governu nian ba ho folin $10.50 tanba ami konta ba kustu viajen no mina karreta nian”, katak.
Notísia relevante: Governu koordena empreza importadór normaliza presu foos
Jornalista: Jesuína Xavier
Editor : Florencio Miranda Ximenes
