DILI, 24 outubru 2023 (TATOLI)-–Governu liuhosi Ministériu Finansa, tersa ne’e, realiza sesaun Komité Revizaun Orsamentu (KRO) ba proposta Orsamentu Jerál Estadu (OJE) tinan 2024.
Atividade ne’e hala’o iha Auditóriu Ministériu Finansa, Aitarak-laran, prezide hosi Primeiru-Ministru, Kay Rala Xanana Gusmão, no Ministra Finansa, Santina Cardoso.
“Relasiona ho aprovasaun kalendáriu preparasaun Orsamentu Jerál Estadu 2024 ne’ebe sirkula ona liuhosi sirkulár orsamentu 2024, iha loron 04 outubru 2023, katak reuniaun Komité Revisaun Orsamentu (KRO) sei realiza hahú iha loron 24 outubru no termina iha loron 09 novembru 2023,” Ministra Finansa, Santina Cardoso, relata liuhosi karta sirkulár ne’ebé Agência Tatoli asesu, tersa ne’e.
Notísia relevante : Konsellu Ministru aprova tetu OJE 2024 biliaun $1,6
Tanba ne’e, Ministériu Finansa hakarak sirkula detalla kalendáriu ba reuniaun KRO tuir liña Instituisaun Servisu sein Fundu Autonoma (SSFA), Servisus Fundu Autonomas (SFA), Instituisaun Estadu inklui munisípiu sira hodi prepara ba reuniaun refere.
Reuniaun ne’e partisipa hosi membru Governu, Autoridade Rejiaun Administrativu Espesiál Oé-cusse Ambeno (RAEOA), responsável Instituisaun Estadu, responsável Ajénsia Públika Autónoma, Autoridade no Administradór munisípiu atu fó importánsia hodi atende no halo diskusaun ho membru KRO nune’e hodi hetan konsiderasaun finál ba elaborobarasaun orsamentu tinan 2024 nian.
Tuir oráriu, iha loron dahuluk KRO diskute uluk OJE 2024 hosi Ministériu Edukasaun, Ministériu Ensinu Superór Siénsia no Kultura, Ministériu Juventude, Desportu, Arte no Kultura, inklui RAEOA.
Jornalista : Antónia Gusmão
Editora : Julia Chatarina
