MAE: Fornesedór kbiit lahanesan difikulta konstrusaun UNP iha terrenu

DILI, 24 outubru 2023 (TATOLI)–Vise Ministru Administrasaun Estatál (MAE), Jacinto Rigoberto, hateten fornesedór materiál konstrusaun ne’ebé iha na’in-tolu ka haat ne’ebé kbiit lahanesan ne’e, sei difikulta konstrusaun Uma Naroman ba Povu (UNP) iha terrenu.
Notísia Relevante: MAE: Tenke ezekuta hotu millaun $32 hafoin bele kontinua UNP 2023
“Ida-ne’e mak problema duni tanba ita-nia fornesedór iha tolu haat kedas ba uma ida, entaun ida-ne’e mak kauza problema. Ezemplu ida mak fornesedór simente ho besi nian mak tula tiha depois fornesedór rai-henek ho fatuk nian seidauk iha kapasidade entaun tenke hein. Ida-ne’e sasán seluk hanesan simente aat tiha, ida-ne’e sai problem aida ba ita,” nia dehan ba agência Tatoli iha Ministériu Negósiu Estranjeiru no Kooperasaun (MNEK), iha Avenida de Portugál (=anterior; Praia dos Coqueiros), tersa ne’e.
Maibé ho kestaun ne’e, nia dehan, futuru ministériu planeia fornesedór tenke ida de’it no tenke lokál, nune’e hein fornese de’it se lae fornesedór mak iha na’in-tolu ka haat ne’e, sei halo ulun moras no atraza tebes mesmu osan alokadu ona.
“Ita hakarak ne’e fornesedór ne’e tenke lokál para labele ulun moras tanba ida agora ne’e dala ruma fornesedór hosi fali suku seluk no postu seluk. Ida-ne’e ami sei hadi’a hotu,” nia dehan.
Xefe suku Samalari, Postu Administrativu Baucau Vila, Munisípiu Baucau, Rui Sorteiro Magno Siqueira, hateten UNP ba faze dahuluk nian ne’e finaliza ona uma tolu no entrega ona ba na’in, ida seiduak ne’e tanba mudansa klimátika no dalan la di’ak, mota no rai manu-teen entaun atraza uituan.
“Maibé iha faze daruak implementa uma sia ba aldeia tolu Samalari, Sorulai no Ossoluga ne’e. Iha ha’u-nia aldeia Ossoluga ne’e iha uma ida mak seidauk konklui tanba badaen nia baruk-teen servisu no badaen mós halo servisu seluk no partikulár mak barak entaun uma ne’e paradu. Ha’u hanesan xefe suku, ha’u fó ameasa ona ba badaen atu aselera tanba nia asina kontratu mak halo no karik ba oin mak ho argumentu nune’e mak ami sei truka badaen. Ha’u fó xamada atensaun ba badaen ne’e, tanba sira hakarak halimar progresu dezenvolvimentu ba nasaun liuliu suku ne’e rasik,” nia dehan.
Kona-ba fornese materiál ne’e, nia dehan, baibain halo ne’e hatama ulik materiál ba 50% nian mak faze daruak hatama tan materiál seluk, tanba ida 50% ne’e uma hamriik ona no kompleta tan 50% mak nahe azulezu, pinta no prienxe sasán depois prontu ona mak entrega ba uma-na’in.
“Agora ita halo uma ida ho montante rihun $17 ne’e presiza apoiu hosi benefisiáriu hodi kontrola no tau-matan, entaun osan restu ita sei hola sasán uma laran nian. Tanba, kuandu la kontrola mak badaen halo manobra, entaun osan ne’e sei la to’o ba sosa sasán uma laran nian,” nia hateten.
Xefe suku Serelau iha Lautém, Denósio Soares, hateten konstrusaun Uma Naroman ba Povu (UNP) faze dahuluk no daruak ne’e finaliza no entrega ona ba uma-na’in.
“Faze dahuluk aldeia Rahanu hetan uma tolu no faze daruak aldeia Puruwari no Adawari hetan uma lima-lima, agora ita-nia benefisiáriu sira uza ona,” nia dehan.
Xefe Suku Leorema munisípiu Liquiça, Sandra de Araújo, hateten kona-ba kostrusau UNP iha Leorema laiha problema tanba konstrusaun ne’e hetan apoia hosi família no komunidade, nune’e entraga ona ba na’in hodi uza.
Jornalista : Osória Marques
Editór : Cancio Ximenes

