DILI, 24 outubru 2023 (TATOLI)–Ministériu Edukasaun (ME) planeia ona halo rekrutamentu ba profesór hamutuk 1.000 ho Orsamentu Jerál Estadu (OJE) tinan 2024.
“Ministériu Edukasaun aprezenta pakote fiskál ne’ebé mak fó ba ami hamutuk millaun $109, ami konsege halo ezersísiu hodi aloka hotu orsamentu ne’e maibé ami presiza tan aumentu ka adisionál liu-liu iha kategoria saláriu no bens no servisu. Felizmente ami hetan tan adisionál millaun $6 atu kobre ba kategoria rua ne’e,” Ministra Edukasaun, Dulce de Jesus Soares, hateten hafoin partisipa iha reuniaun Komité Revizaun Orsamentu ba OJE 2024, iha auditóriu Ministériu Finansa, Aitarak-laran, tersa ne’e.
Ministra Edukasaun dehan, ME husu orsamentu adisionál tanba presiza aumenta tan profesór na’in-30 ba Eskola Referénsia Lian Portugés, Centro de APrendizagem e Formação Escolar (CAFE), ne’ebé hanesan eksola liuhosi kooperasaun entre Ministériu Edukasaun ho Governu Portugál.
Notísia relevante : Governu hahú ohin sesaun KRO ba OJE 2024
“Iha orsamentu ida-ne’e Ministériu Edukasaun mós sei halo rekrutamentu ba graduasaun foun sira hosi área edukasaun pur volta profesór 1.000. Daudaun ministériu halo hela levantamentu ne’ebé hatudu presiza aumenta tan profesór 1.000,” nia tenik.
Governante ne’e salienta, tuir estatutu karreira dosente katak, mínimu abilitasaun literária ba ema ida atu sai profesór iha ME mak baxarelatu.
“Sé ami hetan mastradu, lisensiatura, dotoramentu, ne’e di’ak liután atu nune’e bele hasa’e kualidade edukasaun, maibé minímu baxarelatu no sei fó prioridade ba ema ne’ebé gradua hosi área edukasaun,” nia akresenta.
Aleinde ne’e, orsamentu ME tinan 2024 sei finansia prioridade importante sira hanesan pre-eskolár, nível ensinu hotu, jestaun rekursu umanu, formasaun profesór no infraestrura eskolár.
“Nune’e, sei harii nafatin eskola tuir nesesidade tanba bazeia ba programa tinan-lima Governu presiza harii tan sala aula 5.000 resin, entaun ami halo fazeadamente, ne’ebé iha orsamentu millaun $5 atubele halo konstrusaun eskola. Iha área konstrusaun nian ami sei foka ba projetu sira ne’ebé daudaun la’o hela maibé Ministériu, ne’ebé hetan apoia osan hosi parseiru sira hodi halo konstrusaun ba eskola,” nia haktuir.
ME sei halo konstrusaun ba eskola 20-resin iha territóriu Timor, iha tinan 2024.
Jornalista : Antónia Gusmão
Editora : Julia Chatarina
