BOBONARO, 24 outubru 2023 (TATOLI)-Komando PNTL munisípiu Bobonaro hamutuk ho FALINTÍL-Forsa Defeza Timor-Leste (F-FDTL) ne’ebé destaka iha postu Tunubibi, firme no preparadu ona atu asegura seguransa durante eleisaun suku ne’ebé sei realiza iha loron 28 fulan-outubru 2023.
Segundu Komandante PNTL munisípiu Bobonaro, Asistente Superintendente, Fásiu de Jesus Lima, hateten forsa rua ne’e kumpre ona responsabilidade hodi hahú transporta materiál sensitivu eleisaun suku nian hosi munisípiu Dili mai Maliana.
No tuir planu iha loron 26 fulan-outubru 2023, instituisaun rua ne’e sei fó seguransa ba enkontru meza asembleia aldeia no prosesu tomak durante eleisaun suku nian.
Notísia Relevante:PNTL Bobonaro suspende provizóriu atividade arte-marsiál
“Polisia sei koloka ba iha sentru votasaun 193, enkuantu iha apoia hosi nasionál mai,ita sei koloka pelu-menus ida-ida iha sentru votasaun, maibé la’ós sira mesak iha ne’ebá hotu-hotu ne’ebé iha sentru votasaun ne’e ita hamutuk asegura ba iha prosesu eleisaun ne’ebé ita atu liubá,” Nia informa asuntu ne’e ba jornalista sira iha salaun enkontru autoridade munisípiu Bobonaro, tersa ohin.
Iha biban hanesan Komandante F-FDTL destakamentu postu Tunubibi, Primeiru Sarjentu Vicente Freitas, hateten F-FDTL ninia prezensa iha Tunubibi komesa kedas iha tinan 2009 ho ordem klaru katak atu apoia seguransa ho komando PNTL munisípiu no apoia atvidade hotu ne’ebé la’o iha munisípiu Bobonaro.
Tanba ne’e, nia apela ba komunidade hotu-hotu liu-liu lider organizasaun arte-marsiál no rituál sira atu kontrola membru sira nune’e bele fó kontribuisaun ba pás no estabalidade durante eleisaun orgaun suku.
“Hau fó hatene ida ne’e para ita-nia polítika sira nia planu ne’e la’o ba oin, la,ós ita mak halo impendimentu ‘Boikota’ fali, mais hau simu ordem klaru ona ne’e o halo ‘Boikota’ ruma ne’e hau hateten ne’e imi tama rai-koak mós ami tuir ita la’ós ameasa malu,” nia afirma
Entertantu, antes ne’e, Komando jerál PNTL hasai ona karta orientasaun ba Komandu Munisípiu Bobonaro ho númeru referensia 560,CG-PNTL/X/2023, 13 outubru hodi suspende provizóriu atividade arte-marsiál no rituais hahú loron 23 fulan-outubru to’o loron 06 fulan- novembru hodi fó espasu ba autoridade seguransa hodi asegura eleisaun suku.
Notísia Relevante:PNTL Bobonaro la autoriza eleitór sira uza atributu arte-marsiál no rituál iha eleisaun suku
Jornalista: Sergio da Cruz
Editór: Agapito dos Santos
