iklan

BOBONARO, ELEISAUN, MUNISÍPIU

STAE Bobonaro halo pakotementu ba materiál eleisaun suku

STAE Bobonaro halo pakotementu ba materiál eleisaun suku

Ekipa Sekretáriu Tekniku Administrasaun Eleitorál (STAE) Munisípiu Bobonaro,halo hela pakotementu ba meteriál sensitivu ho no-non sentivu eleisaun suku,imagen Tatoli/Sergio da Crus

BOBONARO, 24 outubru 2023 (TATOLI)-Sekretáriadu Tékniku Administrasaun Eleitorál (STAE) munisípiu Bobonaro, tersa ne’e, hahú halo ona pakotementu ba materiál sensitivu ho non-sensitivu sira nune’e bele fasilita iha eleisaun suku  ne’eb’e sei realiza iha loron 28 semana ne’e.

“Ita halo pakotementu ba materiál hanesan buletin xefe suku no xefe aldeia nia ita prevee kedas mós bá karik akontese segunda ronde, tanba xefe aldeia nia ita tenke realiza kedas eleisaun iha 28 ne’e karik aldeia balun akontese segunda volta,” Diretór STAE munisípiu Bobonaro, Mariano Viegas Amarál, informa ba jornalista sira iha kna’ar fatin Maliana.

Notísia Relevante:STAE Bobonaro presiza karreta 65 apoia eleisaun suku

Nia hateten hafoin finaliza prosesu halo pakotementu ba material hirak ne’e, tuir planu iha loron 27 fulan-outubru 2023 ekipa STAE sei transporta material hamutuk 65 ho karreta Estadu munisípiu Bobonaro nian hamutuk unidade 18, apoia hosi nasionál 10 no aluga karreta 37.

“Ami koordena ona ho administradór postu sira para identifika transporte di’ak iha postu ida-idak para ita bele aluga iha atividade distribuisaun materiál no rekoilla materiál hosi sentru votasaun bá postu administrativu,” nia esplika.

Iha fatin hanesan Prezidente Autoridade Munisípiu Bobonaro, Ernesto de Oliveira Barreto, apela ba ekipa tomak liu-liu Polísia Nasionál Timor-Leste atu reponsabiliza hodi asegura materiál eleisaun bó to’o fatin destinasaun ho di’ak no seguru.

“Materiál sira ne’e kuandu desloka ona bá iha sentru suku ho aldeia tenke ho atensaun másimu iha dalan labele iha faillansu. Ida ne’ebé mak iha faillansu ne’e resiko,” Autoridade Munisípiu ne’e hateten.

Tuir observasaun Jornalista TATOLI durante prosesu  pakotementu materiál sensitivu ho non-sensitivu ne’ebé realiza iha edifísiu STAE ne’e hetan supervizaun hosi Komisaun Nasionál Eleisaun (CNE, sigla Portugués) no  hetan seguransa hosi ekipa Polísia Nasionál Timor-Leste munisípiu Bobonaro.

Enkuantu,  tuir dadus STAE nian rejistu sentru votasaun iha munisípiu Bobonaro hamutuk 193 kobre suku 50 hosi postu administrativu Atabae, Balibo, Bobonaro, Cailaco, Maliana no Lolotoe.

Notísia Relevante:STAE Bobonaro ho líder lokál sira diskute preparasaun eleisaun suku

Jornalista: Sergio da Cruz

Editór: Agapito dos Santos

iklan
iklan

Leave a Reply

iklan
error: Content is protected !!