VIQUEQUE, 25 outubru 2023 (TATOLI)–Abitante Loco-Loco hamutuk ho autoridade lokál hosi aldeia Loco-Loco, suku Matahoi, postu Uatulari, munisípiu Viqueque, husu ba Governu atu aselera implementasaun projetu eletrifikasaun nasionál hodi bele hetan naroman.
Portavós no Reprezentante Xefe aldeia Loco-Loco, Manuel dos Santos, hateten, abitante lokál la asesu eletrisidade desde restaurasaun independénsia ka durante tinan-20 resin nia laran ona.
“Tanba ne’e, ami husu ba Governu atu tau atensaun ba ami-nia preokupasaun kona-ba ahi eletrisidade atu ami bele asesu naroman. Ami sente triste tanba ami-nia maluk sira asesu ona maibé ami kontinua tuur iha nakukun nia laran, nune’e ami sente katak ami iha Loco-Loco seidauk sente ukun rasik-an,” Autoridade komunitária dehan liuhosi konferénsia imprensa, iha aldeia Loco-Loco, kuarta ne’e.
Notísia relevante : Projetu eletrifikasaun pakote 34, hitu iha faze implementasaun
Nia haktuir, antes ne’e ekipa téknika sira tau ona ai-rin eletrisidade, maibé ho mudansa governasaun seidauk konsege kontinua projetu.
“Iha mandatu VIII Governu, iha abríl 2023, ekipa sira trata ona ami-nia preokupasaun, lori ona ai-rin eletrisidade iha aldeia Loco-Loco no abitante lokál sira voluntáriamente hamriik lalin ai-rin, maibé agora abandonadu,” nia hato’o.
Tanba ne’e, nia sujere, Ministériu Obra Públika (MOP) atu tau-matan ba abitante nia preokupasaun.
Iha fatin hanesan, Reprezenta juventude Loco-Loco, Filomeno de Carvalho, haktuir, tinan barak nia laran, bainhira oan sira estuda iha tempu kalan sempre hasoru difikuldade tanba laiha ahi.
“Ami-nia moris durante ne’e depende de’it ba lampu kiik-oan, lilin no kamí. Maibé abitante sira ne’ebé laiha osan dala ruma tempu kalan sira tuur iha nakukun laran. Nune’e, ami husu ba IX Governu atu tau-matan ba ami-nia halerik,” nia tenik.
Nune’e mós, Reprezentante abitante Loco-Loco, Mateus Pinto, hateten, abitante sira terus tinan barak tanba tuur iha nakun laran no laiha ema ruma tau-matan.
“Ha’u fuuk mutin tan ona maibé seidauk asesu ba ahi eletrisidade. Dala barak boot sira (ukun na’in sira) mai ami-nia aldeia, ami hato’o beibeik, maibé seidauk rezolve. Tinan barak ami tuur iha nakukun laran, ami sente terus liu ona,” nia salienta.
Tuir dadus, abitante iha aldeia Loco-Loco, ne’ebé hanesan área remota hamutuk 200-resin hosi uma-kain 73.
Jornalista : Vitorino Lopes da Costa
Editora : Julia Chatarina
