COVALIMA, 25 outubru 2023 (TATOLI) – Supeitu APC ba kazu omisídiu Rui Amarál Lopes, estudante finalista husi Eskola Sekundária Jerál Públiku Suai, kumpre ona prizaun preventiva iha estabelesimentu prizionál Suai iha loron 24 outubru.
“Ha’u hakarak dehan liga ho kazu omisídiu ne’ebé hakotu Rui Amaral Lopes nia vida, Tribunál [Suai] fó ona despaixu, nune’e nia iha ona prizasaun preventiva”, Komandante PNTL Covalima, Superintendente Polísia Calisto Gonzaga, informa iha Tilomar, ohin.
Superintendente Polísia esplika katak maske autór kumpre ona prizaun preventiva, maibé ba sidadaun ne’ebé envolve iha kazu asasinatu ne’e sei aprezenta ba tribunál, nune’e bele tetu atu fó medida koasaun.
Relasiona ho akontese kazu omesídiu iha postu Tilomar, Komandu PNTL Covalima asegura ema na’in-30-resin durante loron tolu, tanba sidadaun sira trauma no daudaun reintegra ona ba komunidade.
Nia klarifika katak kazu omisídiu akontese la’os tanba problema arte marsiál, maibé kestaun partikulár hodi hakotu Rui Amarál Lopes nia vida.
Rui Amarál Lopes hakotu nia pregrinasaun iha mundu iha loron sábadu (21/10) no família matebian halot ona mate-isin tuir kultura postu Tilomar nian iha loron 24.
Notísia relevante: PNTL detein suspeitu na’in-rua ba kazu omisídiu iha Tilomar
Jornalista: Celestina Teles
Editora: Maria Auxiliadora
