DILI, 25 outubru 2023 (TATOLI)—Ministru Transporte no Komunikasaun, Miguel Marques Gonçalves Manetelu, hateten, Governu planeia kria diploma ministeriál ida atu regulariza karreta boot sira tula sasán hosi fronteira terrestre tama territóriu nasionál.
“Loos duni katak karreta boot sira ne’e tula sasán todan bele estraga ita-nia estrada sira, maibé konsekuénsia ne’e iha tanba ita aplika tarifa ba sira, konserteza katak folin sasán sira sa’e iha merkadu tanba sasán sira ne’ebé tula ne’e nesesidade bázika,” Ministru Miguel informa ba jornalista sira hafoin ramata aprezentasaun orsamentu, iha auditóriu Ministériu Finansa, Aitarak-laran, kuarta ne’e.
Notísia relevante : Alfándega nota empreza importadór hatama sasán hosi postu integradu fronteira terrestre
Tanba ne’e, governante ne’e konsidera, bainhira atu kria regra ida tenke haree mós aspetu sira seluk tanba ninia impaktu ne’e iha.
“Kuandu ida-ne’e akontese maka públiku hakilar maka’as fali katak Governu hasa’e folin sasán. Ne’ebé molok aplika regra sira ne’e tenke haree didi’ak tanba ami hanesan servisu ba públiku, no sempre kestiona desizaun sira ne’ebé Governu foti,” nia akresenta.
Governante ne’e salienta, Governu sei haree didi’ak tanba bainhira karreta boot sira ne’e tula sasán bele estraga estrada tanba estrada sira halo uza osan povu nian, enkuantu karreta tula sasán todan liu kapasidade estrada.
“Bainhira kria ona lei la’ós tenke aplika kedas maibé sei koordena ho parte sira hanesan Ministériu Finansa no Ministériu
Komérsiu no Indústria,” nia tenik.
Jornalista : Antónia Gusmão
Editora : Julia Chatarina
