Komité Revizaun Polítiku iha kompeténsia verifika alokasaun rekursu submisaun orsamentál
DILI, 25 outubru 2023 (TATOLI)—Governu liuhosi Konsellu Ministru aprova ona projetu Rezolusaun, ne’ebé aprezenta hosi Vise-Ministra Finansa, Felicia Claudinanda da Cruz Carvalho, kona-ba definisaun kompozisaun Komité Revizaun Polítiku ba elaborasaun proposta Orsamentu Jerál Estadu (OJE) 2024.
“Komité Revizaun Polítiku mak iha kompeténsia hodi verifika alokasaun estratéjika kona-ba rekursu submisaun orsamentál, ho objetivu atu atinje kompromisu no objetivu sira ne’ebé hatuur iha dokumentu estratéjiku no analiza kapasidade atu ezekuta planu ba tinan finanseiru 2024 nian,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu kuarta ne’e.
Komité Revizaun Polítiku sei prezide hosi Primeiru-Ministru, kompostu hosi Vise-Primeiru-Ministru na’in-rua, Ministra Finansa, Ministru Obra Públika no Ministru Planeamentu no Investimentu Estratéjiku.
Notísia relevante : Governu hahú ohin sesaun KRO ba OJE 2024
Nune’e mós, Sekretária Estadu Igualdade no Inkluzaun, Prezidente Institutu ba Defeza Direitu Labarik no Reprezentante ida hosi Asosiasaun Defisiente Timor-Leste sei partisipa mós iha reuniaun Komité hanesan observadór.
Reuniaun Komité Revizaun Orsamentál realiza loron 24 outubru to’o 09 novembru, iha aditóriu Ministériu Finansa.
Komité Revizaun Orsamentál tenke asegura kapasidade hodi ezekuta planu anuál ba servisu no entidade setór públiku administrativu inklui ninia konformidade ho prioridade nasionál sira ne’ebé define ona bazeia ba Planu Estratéjiku Dezenvolvimentu 2011 -2030.
Enkuantu, iha program Governu, planu ba médiu prazu inklui planu servisu anuál sira no entidade sira iha setór públiku administrativu no iha dokumentu polítiku inklui estratéjiku sira seluk.
Alokasaun dotasaun orsamentál sira ba kada servisu ka entidade tenke tuir ninia planu anuál no respeita limite másimu despeza ne’ebé molok ne’e define ona ba kada títulu.
Jornalista : Antónia Gusmão
Editora : Julia Chatarina
