VIQUEQUE, 25 outurbru 2023 (TATOLI)—Líder Igreja Evanjélika Assembleia de Deus Timor-Leste (EADTL), kuarta ne’e, inaugura Igreja Evanjélika iha aldeia Loco-Loco, suku Matahoi, postu administrativu Uatulari, munisípiu Viqueque.
Iha biban ne’e, Pastór Evanjélika rejiaun I, Manuel Alves Pinto, hateten, nu’udar fiar na’in tenke agradese ba Maromak hodi fó kbiit no forsa hodi harii igreja ida-ne’e atu sarani kristaun sira bele transmite Maromak nia evanjelu.
“Ita hamutuk inaugura Igreja Evanjelélika Loco-Loco, ne’ebé hahú kedan iha tinan 2014 to’o fali 2023. Maromak fó kbiit ba imi agora foin finaliza no halo inagurasaun. Ha’u fó onra ba kristaun iha ne’e, maski orsamentu ne’ebe ami apoia ki’ik, maibé kristaun sira responsabiliza hodi halo kontrusaun uma igreja,” Manuel Alves Pinto, hateten hafoin ramata atividade inagurasaun.
Notísia relevante : GASC no autoridade lokál inaugura igreja Betesda Naedala iha Viqueque
Pastór rejiaun I ne’e dehan, liuhosi uma Igreja Evanjélika ida-ne’e, kristaun sira kontinua hametin fiar no haklaken evanjelu tanba ema ne’ebé koñese evanjelu maka nu’udar Maromak nian oan.
“Liuhosi relijiaun ne’e, halibur ita hodi kontinua ita-nia adorasaun hamutuk ba Maromak. Ha’u husu ba kristaun sira tenke uza igreja hodi haklaken Maromak nia evanjelu, labele abandona,” nia hato’o.
Iha fatin hanesan, Prezidente Komisaun ba inaugurasaun Igreja Evanjelélika Loco-Loco, João Pinto, agradese ba kontribuisaun funduho montante $3.000 resin ba konstrusaun igreja ho medida 7×10.
“orsamentu sira-ne’e gasta hotu ba konstrusaun. Materiál konstrusaun hanesan besi, rai henek, fatuk bataku ne’ebé kontribui hosi kristaun Evanjélika oferese ba konstrusaun igreja Loco-Loco hodi finaliza ba konstrusaun,” nia relata.
Iha fatin hanesan, reprezentante xefe aldeia Loco-Loco, Manuel do Santos, hateten, aldeia Loco-Loco iha relijiaun rua hanesan Evanjélika no Katólika, maibé durante ne’e sempre kolabora hamutuk no suporta malu tantu ativdade saida de’it maka realiza iha aldeia.
“Sarani sira sempre kolabora hamutuk hodi apoia iha kualker atividade,” hato’o.
Tuir dadus, Kristaun Evanjélika de Deus tinan 2023 iha rejiaun I kompostu hosi munisípiu Viqueque, Lautém, Baucau no Manatuto hamutuk na’in-3.415 no Pastór hamutuk na’in-39. Enkuantu Igreja Evanjélika iha rejiaun I hamutuk 24, balun permanete ona no balun sei provizóriu.
Jornalista : Vitorino Lopes da Costa
Editora : Julia Chatarina
