DILI, 25 outubru 2023 (TATOLI) – Ministériu Edukasaun (ME) liuhusi Gabinete Unidade Kurríkulu Nasionál verifika ona pontu ezame nasionál husi munisípiu sira, nune’e bele identifika estudante na’in hira maka realiza ezame no hira maka latuir.
“Ita hahú ona halo verifikasaun hodi haree relatóriu kada munisípiu sira no nia rezultadu la’o oinsá? Será ke númeru estudante sira ne’ebé realiza ezame nasionál ne’e mantein duni hanesan númeru anteriór ka iha mudansa ruma”, Koordenadór Gabinete Unidade Kurríkulu Nasionál, João Maupelu, hatete iha salaun Nobre Ian Martin, Balide.
Prosesu verifikasaun foin hahú no presiza tempu, tanba ne’e gabinete seidauk bele anunsia ba públiku númeru estudante sira ne’ebé maka realiza ezame nasionál iha tinan ida ne’e no na’in hira maka auzente. Husi númeru falta sira ne’e na’in hira maka sei hetan fali direitu hodi tuir ezame iha segunda xamada.
“Kalendáriu tentativa ba ezame segunda xamada deside ona ba loron 07 novembru, maibé depende ba prosesu verifikasaun pontu ezame sira ne’e. Kuandu hotu sedu mak data ne’e bele mantein no prosesu ne’e maka atraza bele adianta”, dehan.
Dadus ne’ebé maka kada servisu edukasaun sira relata ona husi munisipál katak estudante ne’ebé realiza ona ezame nasionál iha tinan ida ne’e hamutuk 54.998 (falta dadus husi Oé-Cusse) husi totál estudante rejistadu 56.495.
Dadus alunu sira realiza ezame iha kada munisípiu
Númeru estudante ne’ebé realiza ona ezame hahu husi munisípiu Ainaro hamutuk 2.735 (husi totál alunu rejistadu 2.742), na’in-hitu maka la tuir ezame nasionál tanba deziste ona. Iha Aileu, alunu 2.174 (husi totál 2.181), na’in-hitu maka la tuir tanba moras no sei realiza fali iha segunda xamada.
Iha Ermera, estudante 5.359 mak tuir ezame (husi totál 5.451), na’in-92 mak la tuir, maibé tolu sei iha oportunidade atu ezame segunda xamada. Iha Baukau, 5.837 (husi totál 5.851), alunu 14 mak latuir ezame, na’in-hitu sei tuir segunda xamada, ida mate no seluk deziste.
Iha Liquiçá estudante 2.462 (husi 2.466) mak realiza ezame no haat labele tuir tanba moras no hein fali iha segundu xamada. Bobonaro estudante hamutuk 8.359 no realiza hotu ezame nasionál. Lautém iha estudante 3.181 (husi totál 3.203), na’in-22 maka la realiza, maibé hitu maka sei hetan oportunidade no seluk laiha informasaun.
Covalima iha estudante 2.663 ne’ebé tuir ezame (husi totál 2.680), alunu 17 mak la tuir – 13 laiha justifikasaun, rua laiha diploma no rua seluk moras no sei tuir fali ezame iha segunda xamada.
Iha Manufahi estudante 2.781 (husi totál 2.785) mak tuir ezame, no haat la tuir, maibé ida moras sei iha oportunidade atu tuir fali ezame iha segundu xamada. Dili iha alunu 15.752 (husi totál 15.899), na’in-147 falta tanba problema ho dokumentu – na’in-137 sei iha prosesu verifikasaun no 10 konsidera lahetan ona fatin atu tuir ezame.
Iha Vikeke alunu 3.393 mak tuir ezame (husi totál 3.402), na’in-9 la tuir, maibé ida maka sei hetan oportunidade atu realiza fali ezame tanba moras.
Notísia relevante: Alunu rihun 56-resin realiza ezame nasionál iha outubru
Jornalista: Tomé Amado
Editora: Maria Auxiliadora
