DILI, 25 outubru 2023 (TATOLI)—Ministru Transporte no Komunikasaun, Miguel Marques Gonçalves Manetelu, nota katak, Governu antes ne’e selebra ona akordu balun kona-ba servisu aéreu maibé to’o agora seidauk implementa.
“Iha governasaun anteriór asina ona akordu servisu aéreu lubuk ida maibé aviaun mai ne’e rua de’it, rua ne’e mós ida ita-nia, kuandu ita-nia la presiza akordu ida, ne’ebé ita asina nafatin ba mós aviaun mak Citilink ne’e de’it, Ministru Miguel informa ba jornalista sira hafoin ramata aprezentasaun orsamentu iha auditóriu Ministériu Finansa, Aitarak-laran, kuarta ne’e.
Notísia relevante : Governu asina ona akordu servisu aéreu ho nasaun lima
Tuir Ministru, empreza aérea mak seidauk komunika buat ruma, nune’e parte Governu labele halo avaliasaun.
“Ema lakohi lori sira-nia aviaun mai ne’e ita atu halo avaliasaun oinsá. Daudaun ne’e nasaun balun husu atu asina maibé ita asina tiha ba la mai ne’e hanusa. Ne’ebé tempu badak sei asina akordu servisu aéreu ho Filipina,” nia akresenta.
Antes ne’e, iha mandatu VIII Governu selebra ona akordu servisu aéreu (ASA, sigla inglés) ho nasaun sira hanesan Emiradu Árabe Unidu, Qatar, Nova Zelándia, Kambódia no Brunei Darusalam, ne’ené hosi akordu hirak ne’e, Parlamentu Nasionál ratifika ona akordu ho Emiradu Árabe Unidu, enkuantu hirak ne’ebé sei iha prosesu maka akordu ho Xina, Malázia, Quait, Turkia, Filipina, no Portugal.
Jornalista : Antónia Gusmão
Editora : Julia Chatarina
