USAID fasilita empréstimu millaun $3 ba Kaebauk
DILI, 24 outubru 2023 (TATOLI)—Ajénsia Estadu Unidu ba Dezenvolvimentu Internasionál (USAID) Timor-Leste fasilita ona empréstimu dahuluk hosi International Development Finance Corporation(DFC) ne’ebé sei hetan aprovasaun ba Timor nian instituisaun mikro finansa.
“Kaebauk Investimentu no Finansa (KIF) sei uza empréstimu millaun $3 ne’e hodi promove asesu ba finansia empreza mikro rurál no feto sira hodi apoia hasa’e oportunidade ekonomia,” refere nota ne’ebé Agência Tatoli asesu, kuarta ne’e.
DFC anunsia aprovasaun millaun $3 ba tranzasaun KIF ne’e iha loron 05 outubru 2023, ne’ebé hola parte ba kompromisu biliaun $9,1 ba projetu foun hamutuk 132 ba tinan fiskál 2023 hodi promove impaktu dezenvolvimentu no prioridade estratéjiku iha mundu tomak.
“DFC nia kompromisu reflete ba nesesidade hodi hatan ba mundu nia dezafiu hirak ne’ebé mak boot liuhosi mobilizasaun ba kapitál setór privadu,” nota esplika.
Notísia relevante : MS-USAID valida glosária ba finansiamentu saúde
USAID Timor-Leste hahú tranzasaun DFC ne’e hodi atinje meta dezenvolvimentu hasa’e inkluzaun ekonómiku ba feto no foin-sa’e sira. Aleinde ne’e, sei fornese asisténsia téknika ba KIF hodi hametin institusionál hodi aumenta empréstimu ba empresta na’in sira ne’ebé mak la hetan apoia.
KIF nia susesu ba sustentabilidade no papél prinsipál iha merkadu sei integradu ba feto, foin-sa’e sira no empreza mikro rurál sira hodi hetan asesu ba kréditu iha Timor-Leste.
Estadu Unidu nia Korporasaun Dezenvolvimentu Finanseiru hala’o parseria ho setór privadu hodi fó apoia finanseiru ba solusiona dezafiu sira ne’ebé importante liu iha mundu dezenvolvimentu ohin loron.
Investe iha setór oin-oin inklui enerjia, saúde, infraestrutura krítiku, seguransa ai-han, no apoia empreza ki’ik sira. DFC nia investimentu adere ba padraun a’as no respeita ba ambiente, direitu umanu, no direitu traballadór.
Enkuantu, kona-ba USAID Timor-Leste, Embaixada Estadu Unidu iha Timor-Leste, liuhosi USAID, servisu hamutuk ho Governu Timor-Leste hodi apoia dezenvolvimentu ne’ebé boot no efetivu.
Hahú hosi tinan 2001, USAID fó ona asisténsia dezenvolvimentu millaun $323 ba Timor-Leste.
Aleinde ne’e apoia Timor-Leste iha ninia esforsu atu harii nasaun ne’ebé prósperu, saudável no demokrátiku liuhosi programa sira ne’ebé promove kreximentu ekonómiku inkluzivu no sustentável, liu-liu iha setór agrikultura, hadi’a saúde povu Timor-Leste, liu-liu feto no labarik sira, hametin fundasaun sira ba governasaun di’ak, inklui área hotu-hotu ne’ebé subliña iha Planu Estratejiku Dezenvolvimentu Timor-Leste 2011-2030.
Jornalista : Antónia Gusmão
Editora : Julia Chatarina
