COVALIMA, 26 outubru 2023 (TATOLI) – Autoridade Covalima halo ona lansamentu ba distribuisaun materiál eleisaun suku ba postu adminstrativu Fatululik, Fatumea, Fohorem no Zumalai ne’ebé konsidera iha distánsia dook.
Lansamentu ne’e halo husi Administradór Munisípiu Covalima, Francisco de Andrade, Komandante PNTL Covalima, Calisto Gonzaga, Diretór CNE, Hermenegildo de Sena no Diretór STAE, Francisco Gusmão.
“Ita halo lansamentu hodi distribui materiál eleisaun ba líder komunitária sira ba postu administrativu sira hanesan Fatululik, Fatumea, Fohorem no Zumalai, espesiál bá suku Mape, Lepo no Usecai ne’ebe distánsia dook husi suai vila”, Administradór Covalima hato’o iha Sukaer-laran, ohin.
Ba postu tolu seluk hanesan Suai, Tilomar no Maucatar sei halo distribuisaun materiál eleisaun iha loron 27.
Diretór STAE Covalima, Francisco Gusmão, hatete molok halo distribuisaun materiál halo ona preparativu antes, liuliu disponibiliza formasaun ba pesoál apoiu suku no aldeia nomós ba konsellu suku sira. Tanba ne’e, nia husu ba pesoál no Ofisiál Supervizaun Eleisaun (OSE) sira atu koopera serbisu iha sentru votasaun no estasaun votu sira.
“Tenke foku no akompaña prosesu eleisaun líder komunitáriu iha sentru votasaun ne’ebé kria ona”, dehan.
Iha sorin seluk, Diretór CNE, Hermenegildo de Sena, apela ba Ofisiál Supervizaun Eleisaun labele abandona serbisu iha sentru votasaun no estasaun votu.“Ofisiál Supervizaun Eleisaun atu tau-matan ba lala’ok eleisaun. Bainhira iha prosesu balun la’o laloos tenke koordena no komunika ba ajente seguransa no pesoál STAE ne’ebé koloka iha sentru no estasaun votu sira”, dehan.
Administradór Munisípiu Covalima, Francisco de Andrade, husu mós ba pesoál apoiu suku no aldeia atu serbisu ho imparsiál no labele haree ba kandidatura xefe suku A ou B, nune’e eleisaun komunitária bele la’o ho susesu.
“Husu ba ekipa tomak husi STAE, imi-nian prezensa tomak tenke iha imparsialidade. Foku ba prosesu eleisaun komunitária atu la’o ho diák. Realizasaun eleisaun iha ámbitu demokrásia ho ita-nian esperansa tomak la’o ho pás no estabilidade nia laran. Bainhira iha buat ruma ladún di’ak, administradór postu no OPS tuur hamutuk buka solusaun”, realsa.
Nia salienta, eleisaun suku iha tinan 2023 iha posilibilidade tama ba segunda volta, tanba suku ida iha nia kadidatura to’o na’in-8 no 10. Nia esplika Razaun iha posibilidade ba eleisaun tama ba volta daruak tanba Timor-Leste adota sistema 50+1.
Komandante PNTL Covalima, Superintendente Polísia Calisto Gonzaga, dehan Estadu fó fiar ba seguransa atu garante eleisaun iha sentru votasaun no estasaun votu sira.
“Hela loron rua ita atu hili ita-nian líder komunitáriu. Realizasaun eleisaun suku mai ho dekretu ne’ebé rigór no fó oportunidade ba ema hotu, polísia ne’ebé direta iha terrenu hatudu dedikasaun no komportamentu ba Estadu no Governu. Eleisaun xefe suku la’o ho di’ak”, nia asegura.
Nia hatutan, ajente PNTL sira hatene nia serbisu, hala’o knaar ho rigór, tanba PNTL iha kompeténsia liuhusi lei órganika PNTL nian, Lei Seguransa Nasionál no Seguransa Interna atu garante eleisaun xefe suku.
“Bazeia regra jerál, iha sentru votasaun no estasaun votasaun presiza seguransa nia atuasaun tuir regra, liuliu krime iha kódigu penál artigu 222 no 242 ko’alia kona-ba fraude, perturbasaun no rekuzasaun ne’e labele tolera”, realsa.
Tuir dadus, STAE Covalima rejista kandidatura xefe suku hamutuk 164 – xefe suku mane 148 no feto 16.
Notísia relevante: STAE Covalima aluga viatura hodi transporta materiál eleisaun bá postu administrativu
Jornalista: Celestina Teles
Editora: Maria Auxiliadora
