Bobolait prontu aselera konstrusaun Monumentu 12 Novembru maibé orden projetu tarde
DILI, 26 outubru 2023 (TATOLI)–Diretór Kompañia Bobolait, Lda, Carlito Pereira, hateten empreza Bobolait prontu aselera konstrusaun Monumentu 12 Novembru iha semitériu Santa Crus ne’e maibé orden projetu mak tarde.
Notísia Relevante: MAKLN husu empreza Bobolait justifika konstrusaun Monumentu 12 Novembru seidauk konklui
“Kompañia nunka abandona nia projetu no kompañia hein atu ezekuta no ema ne’ebé mak fó orden ba projetu mak tarde tanba hein kle’ur liu. No, iha ne’ebá ne’e kompañia mak sala hela de’it. Kompañia nunka halo sala tanba buat hotu bazeia ba orden no kompañia hakarak finaliza lalais tanba kuandu tarde kompañia lakon,” Carlito Pereira hateten ba Agência Tatoli, liuhosi telefónika, kinta ne’e.
Iha enkontru ho Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, nia dehan, ministru husu empreza refere tenke aselera konstrusaun ne’e.
“Ministru Oan Soru dehan mai ami servisu ne’ebé la akaba ne’e halo ramata hela lalais ba. Ne’e signifika na’in ba projetu ne’e nafatin fó konfiansa ba ami,” nia dehan.
Diretór ne’e hateten, tuir loloos ne’e projetu kiik-oan ne’e halo tinan ida de’it maibé tanba de’it tendénsia makaas liu iha ne’ebá, nune’e atu fó orden tarde.
“Halo enkontru ba enkontru desizaun nunka sai mak afeta ba projetu konstrusaun ne’e. Agora ne’e ita hein estátua ho azuleju ne’e. To’o agora, ita halo dalan ba saudozu Sebastião Gomes nia rate de’it labele. Ida-ne’e, ita presiza hasai tiha rate iha oin sira mak bele loke dalan ba iha ne’ebá hodi ita taka azuleju. Ida-ne’e de’it to’o agora seidauk deside bainhira mak bele sobu, nune’e ita bele halo. Ha’u labele ba sobu ema-nia rate no presiza iha desizaun mak ita sobu,” nia dehan.
Jornalista : Osória Marques
Editór : Cancio Ximenes
