MAKLN husu empreza Bobolait justifika konstrusaun Monumentu 12 Novembru seidauk konklui
DILI. 25 outubru 2023 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, tersa (23 outubru 2023) ne’e, hala’o enkontru ho Diretór Kompaña Bobolait, Lda, Carlito M. S. Pereira, hodi husu justifikasaun kona-ba projetu konstrusaun monumentu 12 Novembru iha semitériu Santa Cruz ne’ebé to’o agora seidauk konklui.
Notísia Relevante: Estátua ba monumentu 12 Novembru prosesa hela iha portugál
Tuir nota ne’ebé Agência Tatoli asesu kuarta (25 outubru 2023) ne’e haktuir, empreza kontratór atualiza progresu servisu monumentu 12 Novembru 1991, ne’ebé falta de’it nahe mármore ne’ebé hahú hosi odamatan, kapela no hatuur estatua, razaun monumentu 12 Novembru 1991 seidauk konklui tanba produsaun mármore iha rai-laran limitadu.
Kona-ba utiliza mármore rikusoin Timor-Leste nian tuir kontratu ne’ebé estabelese tanba hakarak valorize mármore ne’ebé bele introdús iha monumentu refere.
Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, mós orienta kompañia Bobolait tenke konklui obra refere, hodi kolabora no buka solusaun alternativu ba produsaun mármore no disponibilidade mármore iha rai-laran, hodi responde ba nesesidade konstrusaun, buka atu interpreta tuir kondisaun rasik hodi valoriza memória luta ba independénsia.
Enkontru ne’e, partisipa hosi Asesór Ministru Alcino Soares Gomes, DNGPHP João M.T.da Silva. Tékniku MACLN José Cornélio Amaral no Diretór Empreza Bobolait, Lda, Carlito M.S Pereira.
Notísia Relevante: Governu rekoñese konstrusaun Monumentu 12 Novembru la’o tarde
Jornalista : Osória Marques
Editór : Cancio Ximenes
