DILI, 18 outubru 2023 (TATOLI)–Ministru Asuntu Kombatente Libertasaun Nasionál (MKLN), Gil da Costa Monteiro “Oan Soru”, hateten katak símbolu ka estátua ne’ebé atu hatuur iha odamatan boot monumentu 12 Novembru iha semitériu Santa Crús ne’e sei prosesa hela iha Portugál.
Notísia Relevante: Governu rekoñese konstrusaun Monumentu 12 Novembru la’o tarde
“Agora ne’e seidauk finaliza de’it nia konstrusaun ne’e, maibé prosesu la’o hela tanba ninia problema tékniku mak barak demais, tanba estátua mós tenke kompleta iha Portugál no buat ne’e la’ós fasil. Estátua ne’e mós tenke tuir pedidu komité 12 Novembru nian. Ha’u dehan prosesu estutua ne’e sei iha Potugál no presiza tékniku ba haree iha fábrika no bainhira mak hotu no lori mai Timor-Leste,” Ministru Oan Soru hateten ba jornalista sira, iha Palásiu Governu, kuarta ne’e.
Iha monumentu 12 Novembru ne’e, nia dehan, fotografia manifestante ema lubun ida-ne’ebé mak hamriik iha odamatan boot semitériu Santa Crús nia leten ne’e, mak hodi transforma ba estatua no estatua ne’e sei la tau ema-nia naran no sei la hatudu moos ema ida-nia fotografia, nune’e bele reprezenta ema hotu-hotu nian.
Tanba ne’e, Oan Soru hateten, kona-ba estátua ba monumentu 12 Novembru 1999 ne’e, nia parte labele promete bainhira mak finaliza tanba sasán seidauk kompletu, nune’e labele fó sai uluk nia progresu.
“Ha’u foin mai ministru fulan tolu ne’ebé ha’u labele ptomete bai ta-boot sira katak bainhira mak hotu enkuantu prosesa ba estatua ne’e de’it seidauk hotu”, nia dehan.
Diretor Kompañia Bobolait Unipesoál, Lda, Carlito Pereira, hateten mezmu Bobolait mak manán konkursu ba konstrusaun monumentu 12 Novembru, maibé prosesu hotu hein orden hosi na’in ba projetu refere.
“Ha’u laiha kompeténsia atu ko’alia maibé na’in ba projetu ne’e mak iha kompeténsia. Ha’u laiha kompeténsia atu ko’alia. Husu ba Ministériu Asuntu Kombatente Libertasaun Nasionál mak hatene. Maibé la’ós tan ida-ne’e mak la aselera konstrusaun no ida-ne’e atu di’ak liu husu ba MAKLN iha Caicoli ne’ebá. Tanba, ami halo hotu ona no falta de’it mak estatua ho marmer (azulezu) atu tau dalan haleu rate ne’e, no simbólu 12 Novembru hodi tau iha Kapela oin ne’e,” nia dehan.
Maibé, tuir nia, ida-ne’e prosesu sei dook hela no estátua ne’e halo iha Portugál ne’ebá, tanba kona-ba estátua ne’e kompeténsia ba MAKLN ho Komité 12 Novembru nian.
“Ami kontraktór ne’e hein desizaun hodi halo konstrusaun de’it. Ami hein orden la’ós tuur-tuur mak halo de’it,” nia dehan.
Nia dehan, atu hotu tarde no prolonga tempu la’ós kestaun maibé prosesu ne’e hotu presiza hein desizaun hosi na’in ba projetu ne’e tanba hirak-ne’e presiza desizaun koletivu.
Notísia Relevante: Masakre 12 Novembru hanesan fatór determinante loke mundu nia matan
Jornalista : Osória Marques
Editór : Cancio Ximenes
