BOBONARO, 26 outubru 2023 (TATOLI)-Sekretariadu Tékniku Administrasaun Eleitorál (STAE), munisípiu Bobonaro, kinta ne’e, hahú instala ona tenda hamutuk 42 hodi utiliza hanesan sentru votasaun ba eleisaun suku ne’ebé sei realiza iha loron 28 fulan-outubru 2023.
Diretór STAE Munisípiu Bobonaro, Mariano Viegas Amarál, hateten ekipa STAE instala ona tenda hamutuk 42 ne’e iha suku sira ne’ebé laiha edifísiu públiku atu uza hodi realiza eleisaun suku ne’ebé partensia iha postu administrativu Atabae, Balibo, Cailaco, Maliana no Bobonaro.
Notísia Relevante:STAE Bobonaro halo pakotementu ba materiál eleisaun suku
“Sentru votasaun ne’ebé laiha edifisíu públika, laiha sede aldeia ou eskola, ita prevee osan instala sentru votasaun loke tenda hodi fasilita sira labele la’o dook, ita mós prepara kadeira ho meza sira atu prosesu eleisaun ne’e la’o ho di’ak,”Nia informa ba jornalista sira iha edifisíu administrasaun munisípiu Bobonaro.
Nia dehan hosi sentru votasaun 42 ne’ebé instala provizóriu ne’e sei instala mós enerjia eletrisidade hodi nune’e bele fasilita servisu STAE ho CNE hodi realiza eleisaun suku ne’e ho di’ak.
“Ita identifika laiha liña eletrisidade iha 42 ne’e uluk mais informasaun foun liuhosi EDTL,E.P katak iha fatin barak mak ahi tama ona, entaun menús hosi 42 ne’e ita esforsu tau osan aluga jeradór iha fatin sira ne’e tanba iha 27 kalan materiál to’o ona sentru votasaun no 28 kalan kontajen tarde e bele mos akontese eleisaun segunda ronde ba xefe aldeia nian entaun hakarak ka lakohi ita tenke aluga jeradór,”Mariano hateten.
Dadaun ne’e, tuir nia STAE rekoilla ona karreta Estadu 18 iha munisípiu Bobonaro, karreta 10 ne’ebé apoiu hosi nasionál, kinta ohin to’o ona Bobonaro, no karreta aluga 30-resin hodi transporta materiál sensitive no non sensitivu bá iha sentru votasaun sira.
Tuir oráriu serimonia distribuisaun materiál eleisaun simbolikamente sei hala’o iha loron 27 fulan-outubru 2023 hodi lori bá iha sentru votasaun hamutuk 193 ne’ebé maka instala iha munisípiu Bobonaro.
Notísia Relevante:STAE Bobonaro presiza karreta 65 apoia eleisaun suku
Jornalista: Sergio da Cruz
Editór: Agapito dos Santos
