DILI, 26 outubru 2023 (TATOLI)—Parlamentu Nasionál (PN) hein Governu deside retira kandidatu Komisáriu Komisaun Anti-Korrupsaun (CAC, siglá portugés) na’in-ida hosi kandidatu na’in-rua hafoin ajenda ba eleisaun iha plenária.
Notísia Relevante: CNRT aseita pedidu FRETILIN, hili kandidatura úniku ba Komisáriu CAC
“Konsensu entre bankada sira iha ona. Prontu, ita hein to’ok ninia evolusaun. Governu ohin, promete ona sei fó informasaun iha dia 30-31 outubru tinan ne’e. Ita espera iha informasaun Prezidente Parlamentu Nasionál bele halo atualizasaun,” Sekretária Meza Parlamentu Nasionál, Deputada Virngina Ana Belo, hateten ba jornalista sira hafoin reuniaun líder bankada parlamentár iha uma fukun PN, kinta ne’e.
Reuniaun líder bankada ohin, ne’ebé lidera direa hosi Prezidente Parlamentu Nasionál, Maria Fernanda Lay, ho Xefe bankada parlamentár ko’alia mós kona-ba eleisaun komisáriu CAC.
Tanba ne’e, iha ona entedimentu hosi bankada parlamentár liuliu FRETILIN ho CNRT, oinsá Governu retira kandidatu na’in-ida (1) hosi kandidatu na’in-rua (2) ne’ebé submete mai, nune’e avansa ida de’it entaun nune’e agora hein Governu atu pronúnsia.
“Governu liu-hosi Vise Ministru ba asuntu Parlamentár, Aderito Hugo da Costa hateten hela sei komunika fali ho Konsellu Ministru entre 30 ka 31 outubru, nia sei fó fali informasaun. Se iha, ita bele avansa ona ho ida-ne’e no Prezidente Parlamentu Nasionál sei halo atualizasaun ba ida-ne’e tau ba ajenda,” nia hateten.
Nune’e, nia dehan, ohin reuniaun líder bankada ko’alia kona-ba ida-ne’e depois tanba eleisaun ba komisáriu CAC ne’e por eskrutinu sekretu, intensaun Deputadu líder bankada sira-nian hakarak se kandidatu ema ida ba ne’e ho pezu. Signifika, tenke hetan apoiu bankada tomak hodi nia ba serbisu no ema ida apoiu nia ne’e bankada hotu-hotu,
Nune’e, votasaun eskrutinu sekretu buat hotu bele muda, ne’ebé presiza hein uitoan no iha tiha ona komunikasaun entre bankada sira loos ona, no agora ho fali Governu entaun tenke hein no sukat to’ok Governu iha hanoin balun, nune’e hein tau hanoin ida hodi avansa ba ajenda eleisaun.
Jornalista : Nelson de Sousa
Editór : Cancio Ximenes
