Uma-kain 155 iha suku Laline Viqueque asesu ona eletrisidade
VIQUEQUE, 26 outubru 2023 (TATOLI)—Uma-kain 155 iha suku Laline, postu administrativu Lacluta, munisípiu Viqueque asesu ona eletrisidade hosi Eletricidade de Timor-Leste, Empreza Públika (EDTL, E.P).
“EDTL, E.P nia knaar mak lori naroman ba povu Timor-Leste. Tanba ne’e, ohin ita formaliza ona ahi eletrisidade ba suku Laline, ne’ebé kuaze tinan barak la asesu. Ha’u hato’o parabéns ba povu Laline ne’ebé ho pasiénsia hein no agora foin asesu. Tanba ne’e, ha’u husu ba povu Laline tenke uza ho di’ak no poupa enerjia eletrisidade,” Komisáriu Ezekutivu Servisu Tékniku EDTL, E.P, Latino Jerónimo, hateten, iha serimónia inaugurasaun eletrisidade iha suku Laline, kinta ne’e.
Faze dahuluk, populasaun sei uza ahi gratuita durante fulan-neen nia laran, hafoin ekipa responsável tuun terrenu halo sosializasaun hodi ba oin bele selu.
Projetu eletrifikasaun ba suku Laine implementa iha tinan 2022 to’o 2023, hosi empreza Carnesia Unip, Lda, ho MT kilometru 7.6, BT 3.9, transformadór kva 50, qty 1 Baixada 145, ho kustu $372.186,33.
Notísia relevante : Uma-kain 12.945 iha Viqueque asesu ona liña eletrisidade
Iha biban hanesan, Administradór postu Lacluta, Rui da Costa, haktuir, populasaun lokál desde tinan 2003 bainhira atu halo festa tenke sunu ahu no loke jeradór ki’ik, maibé agora bele hetan ona naroman, nune’e tenke utiliza ahi tuir nesesidade.
“Ita agradese ba Maromak tanba buat hotu la’o tuir nia tempu, maski la’o tinan naruk maka foin bele asesu eletrisidade ida,” nia tenik.
Nune’e mós, Xefe suku Laline, Jaques dos Reis de Carvalho, apresia ba inisiativa di’ak ne’ebé kore ona povu hosi nakukun ba naroman tanba hosi Timor-Leste hetan independénsia foin mak asesu eletrisidade.
“Ami agradese tebes ba Governu, EDTL, E.P no empreza responsável ne’ebé ho esforsu dada eletrisidade ba ami povu Laline ne’ebé kuaze tinan barak nia laran tuur de’it iha nakun laran. Maibé ohin ami asesu ona naroman ida-ne’e, sei benefisia ba povu no estudante sira bele estuda iha tempu kalan,” nia akresenta.
Autoridade suku husu ba parte relevante EDTL, E.P atu tau matan nafatin ba uma-kain seluk ne’ebé seidauk asesu eletrisidade, atu sira mós bele asesu naroman.
“Maski ohin ami kontente, maibé uma-kain 87 sei tuur iha nakukun. Nune’e, ha’u nafatin husu ba parte relevante atu tau konsiderasaun ba sira ne’ebé maka seidauk asesu ba eletrisidade sira-ne’e,” nia hato’o.
Tuir dadus, suku Laline kompostu hosi aldeia lima hanesan Aimeta-Hun, Fatu-Kadó, Mau-Ama, Mikradek no Santo António, ho totál abitante 943 (tinan 2015).
Tuir observasaun Agência Tatoli iha terrenu, nota katak abitante lokál hahú hosi ferik, katuas joven no estudante sente kontente bele asesu ona liña eletritrisidade tanba tinan barak nia laran hela iha nakukun laran.
Durante serimónia inaugurasaun, abitante sira hamutuk ho lia-na’in sira halo serimónia rituál no hamulak ba matebian sira tuir kultura suku Lalaine nian no fase karau nian rai hodi fase ai-rin eletrisidade nune’e ema labele estraga ekipamentu eletrisidade.
Serimónia ne’e partisipa hosi Diretór no tékniku EDTL, E.P, abitante lokál, veteranu, inklui estudante sira.
Jornalista : Vitorino Lopes da Costa
Editora : Julia Chatarina
