Autoridade Bobonaro distribui materiál eleisaun suku ba sentru votasaun 193
BOBONARO, 28 outubru 2023 (TATOLI)-Autoridade Munisípiu Bobonaro (AMB), sesta ne’e lansa distribuisaun materiál eleisaun suku ba Sentru Votasaun (CV, sigla portugés) hamutuk 193 ne’ebé destaka iha suku 50, postu administrativu neen.
Prezidente Autoridade Munisípiu Bobonaro, Ernesto de Oliveira Barreto, husu ba ekipa Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugués), membru Polísia Nasionál Timor-Leste (PNTL), motorista sira no ekipa tomak atu responsabiliza materiál hirak-ne’e to’o fatin destinasaun ho di’ak.
Notísia relevante: PNTL Bobonaro ho F-FDTL firme asegura eleisaun suku
“Bainhira ita susesu iha eleisaun ida-ne’e, susesu ita hotu nia, maibé ita falla iha-ne’e ita faila buat hotu, podér lokál ha’u hanoin Bobonaro ikus karik, tanba ne’e apela ba ita-boot sira, materiál ida-ne’e maski simples surat tahan ida, maibé ita tenke kuida liu fali osan mean,” Ernesto hato’o apelu ne’e iha salaun administrasaun munisípiu Bobonaro.
Nia apela ba ekipa tomak atu tau aas liu interese komún núne’e eleisaun ne’e bele la’o ho susesu.
“Ita-boot sira sai hosi ne’e, ita-boot sira nia kór hela iha portaun ne’e, labele lori, ita haree ema hotu hanesan, labele dehan ida-ne’e, ida-ne’ebá kor ka A kór B,” nia fó hanoin.
Diretór STAE Munisípiu Bobonaro, Mariano Viegas Amarál, apela ba Pesoál STAE Apoia suku (PSAS) no Pesoál STAE Apoia Aldeia (PSAA) atu servisu tuir lei no regra ne’ebé hatuur ona iha lema katak,bdemokrasia, imparsialidade, neutralidade no transparánsia.
“Katak Kandidatu hotu-hotu tantu atu feto ka mane, atu kondisaun diiak ka kondisaun fíziku ladi’ak. Kandidatu hirak-ne’e ita-nia hotu, ita tetu hanean de’it, entaun imi tenke servisu tau matan ho loloos,” Mariano enkoraja.
Diretór CNE Munisípiu Bobonaro, Juvito Ramos, alerta ba Ofisiál Supervizaun Eleitorál (OSE) atu koordena ho parte seguransa hodi tau-matan ba eleisaun ne’e ho matan moris neon-na’in.
“Durante ne’e ami-nia supervizaun até data, ami identifika no ami rona informasaun mai hosi komunidade barak katak iha balu uza ona maneira, hodi halo impedimentu ba iha prosesu aprezentasaun kandidatura, tanba ne’e karik akontese ema ruma halo impedimentu husu parte ho atu halo aprosimasaun ba ema ne’e, se la koopera ita bele uza lei ne’ebé regula,” nia dehan.
Serimónia distribuisaun ne’e partisipa hosi Komandante PNTL Munisípiu Bobonaro, Superintedente Xefe António María de Sá, autoridade postu administrativu sira no prosesu distribuisaun ne’e hetan seguransa másimu hosi membru PNTL ne’ebé halo eskolta kada karreta.
Notísia relevante: PNTL Bobonaro la autoriza eleitór sira uza atributu arte-marsiál no rituál iha eleisaun suku
Jornalista: Sérgio da Cruz
Editór: Evaristo Soares Martins
