PNTL Bobonaro sei atua grupu-individu kontra regra eleisaun
BOBONARO, 28 outubru 2023 (TATOLI)-Komandu Polísia Nasionál Timor-Leste (PNTL) munisípiu Bobonaro lideradu Superintendente Xefe Polísia António María de Sá, sei atua grupu-indivudu ne’ebé kontra regra eleisaun suku no leí ne’ebé hatuur ona iha Konstituisaun Repúblika Demokrátika Timor-Leste.
Asuntu ne’e Komandante PNTL Munisípiu Bobonaro, Superintedente Xefe Polisía António María de Sá, fó-sai iha nia intervensaun iha serimónia distribuisaun materiál eleisaun ba sentru votasaun 193.
Notísia relevante: PNTL Bobonaro ho F-FDTL firme asegura eleisaun suku
“Apela ba seguransa sira, haree regra sira, lei bandu ema labele uza atributu sira-ne’e, uza sasán kro’at, kontamina ho alkól, lori atributu tama hotu, buat sira komete ba krime ho natureza públiku, ne’e leí bandu, ne’e labele akontese,” nia hateten iha edifísiu administrasaun munisipál Bobonaro, sesta ne’e.
Superintendente Xefe ne’e subliña, PNTL no F-FDTL preparadu atu fó seguransa hahú ohin to’o remata prosesu eleisaun suku.
Maibé komandante António María de Sá, orienta membru sira atu kontinua matan moris neon na’in, koopera no kolabora ho ekipa hosi Sekretariadu Tékniku Administrasaun Eleitorál (STAE) no Ofisiál Supervizaun Eleitorál (OSE) sira perante prosesu tomak tanba distánsia seguransa metru 25 hosi sentru votasaun.
“Imi-nia komunikasaun tenke ativu, kuandu mosu ameasa ruma, iha poténsia boot, liu kedas ba ita-nia seguransa sira, núne’e hato’o mai komandu ita bele foti medida,” nia dehan.
Ba kestaun ne’e, nia orienta membru sira bainhira to’o fatin destinasaun identifika kedas lokalidade fatin risku no identifika poténsia ameasa sira liuliu sentru votasaun ne’ebé iha área remota no iha liña fronteira sira hodi bele superviziona no izola fatin refere tuir téknika operasionál polisía nia.
Nia mos alerta ba membru sira atu servisu tuir misaun ne’ebé komandu atribui ona hodi bele garante seguransa ba festa demokrasia ne’e, nune’e bele hatudu imajen di’ak munisípiu Bobonaro nia ba nunisípiu sira seluk.
“imi labele halimar HP, tur hamutuk konversa depois abandona ita-nia misaun, ne’e la permite,” nia fó hanoin.
Enkuantu membru PNTL ne’ebé destaka ba sentru votasaun hamutuk 193 ne’e mai hosi komandu munisípiu Bobonaro, Unidade Patrullamentu Fronteira (UPF) no Unidade Polísia Marítima (UPM).
Notísia relevante: PNTL Bobonaro suspende provizóriu atividade arte-marsiál
Jornalista: Sérgio da Cruz
Editór: Evaristo Soares Martins
