Januário ‘Buka Maluk’ re-eleitu ba xefe suku Oe-Leu
BOBONARO, 29 outubru 2023 (TATOLI)-Xefe suku atuál Oe-Leu, postu administrativu Bobonaro, munisípiu Bobonaro, Januário Meta-Tae Bragança kódigu ‘Buka Maluk’ kontinua re-eleitu ba períodu 2023-2030 hafoin halakon adversáriu Vitorino Gusmão ho votu 408 kontra 261.
Ho rezultádu ne’e ‘Buka maluk’ agradese ba eleitór sira-ne’ebé kontinua depozita konfiansa ba nia hodi lidera suku Oe-Leu ba tinan hitu.
“Sira hili ha’u nafatin tanba durante mandatu tinan hitu, maske iha buat balu falla, maibé buat hotu la’o ho di’ak, ukun ho respeitu, hadomi povu, fó atendimentu di’ak ba sira, tanba ne’e mak sira nafatin fó konfiansa,” nia informa ba Tatoli, iha Oe-Leu, domingu ne’e.
Xefe suku ne’e hatutan, iha mandatu tinan hitu mai ne’e sei kontinua ukun povu ho resonsabilidade la haree ba kór partidu no kór arte-marsiál, tanba iha suku Oe-Leu mesak maun-alin, família ne’ebé uma- lisan hatuur iha lulik ida de’it.
“Maski ida anti, ida pro, balu gosta ha’u, balu la gosta, ida-ne’e normál tanba demokrasia, maibé ba oin ita presiza sai ema ida de’it, nu’udar aman ba suku ida-ne’e, ha’u prontu atu servisu hamutuk ba suku ida-ne’e,” nia dehan.
Total eleitór suku Oe-Leu hamutuk 819 mai hosi aldeia Oe-Leu Taz no Mologen. Hosi númeru ne’e eleitór ne’ebé tuir vota hamutuk 697, votu nulu lima no branku rua.
Eis estafeta Falintil ne’e eleitu ba mandatu dahuluk iha tinan 2016 no to’o agora ukun populasaun hamutuk 1,980 ho totál uma-kain 340-resin.
Notísia relevante: Xefe suku Oeleu-Lourba preukupa projetu PNDS atraza
Jornalista: Sérgio da Cruz
Editór: Evaristo Soares Martins
