Xefe suku Usitaqueno no Cunha kontinua hetan konfiansa iha Eleisaun Órgaun Suku
OÉ-CUSSE, 29 outubru 2023 (TATOLI – Xefe suku Usitaqueno, sub-rejiaun Oésilo no xefe suku cunha, sub rejiaun Pante Makasar, kontinua hetan konfiansa liuhosi Eleisaun Órgaun Suku ne’ebé abitante lokál sira depozita.
Xefe suku Usitaqueno, Francisco Elo, manán ho votu 557 hafoin halakon advesáriu na’in-rua seluk hanesan Francisco Pauf ho votu 111 no Vicente Falo hetan votu ualu.
“Agradese ba konfiansa povu Usitaqueno, tanba hili ha’u sai aman ba povu tomak iha suku Usitaqueno, ha’u manán la’ós orgullu, maibé tanba povu maka hili ha’u ba dalarua, atu serbí ba ema hotu. Ita hatene ukun ne’e la’ós opurtunidade maibé responsabilidade,”
Xefe suku Usitaqueno Francisco Elo, ba Tatoli iha Oé-Cusse, sábadu ne’e.
Nune’e mós xefe suku Cunha, Domingos Seko Caunan, manán ho votu 1.377, hafoin halakon António da Cunha hetan votu 541, Júlio Beno Falo, hetan votu 426 no kandidatu Zeca de Carvalho hetan votu 395.
“Kontajen votajen remata ona, ita agradese ba povu nia konfiansa, tanba hili ha’u re-eleitu, atu tama ba ronde daruak, ha’u la hatene, maibé rezultadu finál, ita manán ho votu 1.377,” nia katak.
Tuir nia, programa ne’ebé antes ne’e ajenda iha prioridade ba tinan hitu, primeiru tenke servisu ba ema hotu, halakon polítika partidu, koopera ho Governu hodi hato’o povu nia preokupasaun ba Governu atu tau matan.
“Ida-ne’e maka ita hala’o ba futuru, tanba ita nu’udar xefe suku sai aman ba suku, no apoia Governu nia programa dezenvolvimentu saida de’it atu implementa iha suku,” nia afirma.
Totál eleitór iha suku Usitaqueno hamutuk 843 komposta hosi mane 413 no feto 430.
Nune’e mós totál eleitór iha suku Cunha 3.822 komposta hosi mane 1.991 no feto 1.831, mai hosi aldeia lima; Maunaebeno 761, Noafafu 844, Noapai 663, Noeninen 1.031 no Umenoah 523.
Notísia relevante: Sentru votasaun Usitasa’e Oé-Cusse hahú kontajen
Jornalista: Abílio Elo Nini
Editór: Evaristo Soares Martins
