Top

FRETILIN preokupa distribuisaun foos hosi empreza importadór laiha kualidade

Traballadór hatún foos importasaun hosi ró. Imajen Tatoli/António Gonçalves

DILI, 30 outubru 2023 (TATOLI)—Deputada bankada FRETILIN iha Parlamentu Nasionál (PN), Helena Martins, preokupa ho kualidade foos balun ne’ebé faan hosi empreza sira-ne’ebé hetan subsídiu hosi Governu ne’e laiha kualidade.

Notísia Relevante: Governu sei halo intervensaun foos importasaun iha semana oin

“Ba foos ne’ebé halo distribuisaun liuliu períodu eleisaun suku iha Baucau tun ba ema sosa, no ha’u mós iha ne’eba aproveita sosa kedas. Foos ne’e mai hosi empreza Kreativu Furak mak distribuisaun sosa ho $10, maibé foos la merese atu ita konsumu tanba foos laiha kualidade.  Ita hatun tiha ona taxa no fó tiha ona subsídiu ba emprezáriu sira mak fó fali foos ida hanesan ne’e,” Deputada FRETILIN ne’e levanta liuhosi reuniaun plenária PN, segunda ne’e.

Tanba ne’e, Deputada ne’e bolu atensaun kedas ba empreza Kreaivu Furak ne’ebé faan foos refere hodi haree ba kualidade foos.

Deputadu FRETILIN, Florentino Ximenes, preokupa ho folin foos iha merkadu mezmu Governu halo ona intervensaun liuhosi fó subsídiu ba empreza importadór foos sira iha Timor-Leste.

“Presu foos labele tun duni, tanba iha ita nia vendedór retailadu sira-ne’ebé mak antes ne’e sira  hola ho kuantidade barak, sira faan seidauk hotu mak la kle’ur Governu nia tun fó subsídiu $12 ba kada saka kilograma 25. Entaun, ha’u hasoru malu ho sira, no sira ko’alia ami labele hatun presu tanba ami hola ho folin aas, oinsá mak hatun ba $12. Governu fó subsídiu ba importadór, ami tenke faan nafatin ho folin $18 ka $19. Hanoin ida-ne’e sériu Governu presiza haree, tanba se presu hanesan ne’e iha postu sira, ida-ne’e oinsá ho postu sira rural,” nia dehan.

Nune’e, nia husu Governu tenke forma ekipa ida atu bele tun ba terrenu hodi aproxima vendedór retaladu sira hodi hatene mekanizmu saida mak bele solusiona situasaun sériu ida-ne’e.

Deputadu CNRT, Patrocínio Fernandes, sekunda Governu presiza tau atensaun tanba fó tiha ona subsídiu no oinsá haree mekanizmu kontrolu.

Vise Ministru ba asuntu Parlamentár, Adérito Hugo da Costa, hateten dezde desizaun Governu atu halo intervensaun presu foos sae, hasoru obstákulu lubun ida hodi analiza situasaun hotu-hotu hodi halo intervensaun oinsá mak Governu halo intervensaun atu resolve.

Entaun, nia dehan, dalan ne’ebé Governu foti liuhosi subsídiu direta ba importadór prinsipál hodi iha tempu badak hodi redús presu foos.

Iha semana liubá, nia hateten, konkretiza ona iha terrenu hodi halo distribuisaun foos no ekipa monitorizasaun ne’ebé lidera hosi Ministéiru Komérsiu Indústria (MKI) iha koordenasaun ho Vise Primeir- Ministru ba asuntu Ekonómiku hala’o iha territóriu tomak, entaun se iha implementasaun mak iha nafatin kestaun kona-ba kualidade foos.

Nia hateten, nia parte sei fó hatene ba ekipa monitorizasaun atu haree ba asuntu kona-ba empreza importadór balun distiribui foos maibé foos laiha kualidade ne’e.

Notísia Relevante: Empreza Perissos fa’an ona foos marka “Amor de familia” ho folin $12.50

Jornalista : Nelson de Sousa

Editór        : Cancio Ximenes  

Publisidade

Leave a Reply

Latest Post

error: Content is protected !!