Kandidatu xefe suku provizóriu 251 sei avansa ba eleisaun segunda ronda
DILI, 30 outubru 2023 (TATOLI)—Diretór Jerál Desentralizasaun Governasaun Lokál (DGL), António Augostu Guterres, hateten tuir rezultadu provizóriu kandidatu xefe suku na’in-251 mak sei avansa ba eleisaun suku segunda ronda iha loron 13 novembru 2023, seidauk inklui ho kandidatu xefe suku sira hosi Viqueque.
Notísia Relevante: Prosesu eleisaun suku 2023 la’o hanesan eleisaun suku iha 2016
“Rezultadu provizóriu pozisaun ba xefe suku ne’ebé sei avansa ba eleisaun segunda volta ho 60%,” Diretór Jerál Desentralizasaun Governasaun Lokál (DGL), António Augostu Guterres, hateten iha konferénsia imprensa ne’ebé realiza iha STAE, Caicoli, segunda ne’e.
Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten hosi xefe suku 251 maihosi totál 442 ne’e hatudu 191 mak eleitu maibé sei falta munisípiu Viqueque nian, entaun aumenta tan ona tanba foin mak enkamiña nia rezultadu mai.
Kona-ba taxa partisipasaun, nia dehan, tuir tékniku sira esplika katak taxa partisipasaun sa’e tanba komprova ho eleitór vota to’o dadeer.
“Ohin, ha’u hetan informasaun ida hosi adminsitradór katak taxa partisiasaun Manufahi ninian ne’e 85%. Ne’e signifika, munisípiu seluk mós nune’e no realidade ne’e komprova ba ita mak vota to’o dadeer. Entaun, hosi Manufahi nian ne’e ita bele halo indikasaun ida katak aas no ida-ne’e ita hein relatóriu hosi munisípiu,” nia dehan.
Hosi 85% ne’e, nia hateten, maihosi totál eleitór iha Manufahi hamutuk 42.310.
Jornalista : Osória Marques
Editór : Cancio Ximenes
