DILI, 30 outubru 2023 (TATOLI)-–Komité Revizaun Orsamentu (KRO) ne’ebé prezide hosi Primeiru-Ministru, Kay Rala Xanana Gusmão, segunda ne’e, haruka Ministériu Interiór (MI) no Sekretaria Estadu Formasaun Profisionál no Empregu (SEFOPE) hadi’a orsamentu ne’ebé prevee iha Orsamentu Jerál Estadu (OJE) tinan 2024.
Ministru Interiór, Francisco da Costa Guterres, klarifika katak razaun seidauk aprova tanba KRO husu atu MI no instituisaun tutela hanesan Autoridade Protesaun Sivil (APC, sigla portugés), Polísia Nasionál Timor-Leste (PNTL) atu halo ajustamentu hodi haree didi’ak depois aprezenta hikas ba iha loron sira tuir mai.
“Primeiru-Ministru husu ami kompleta tiha lai mak lori fali mai. Iha buat barak ne’ebé presiza hadi’a ligadu ho rekrutamentu ba membru Polísia, tanba iha kestaun balun presiza justifikasaun, ne’ebé KRO seidauk aprova,” Ministru hateten hafoin aprezenta orsamentu tinan 2024 iha KRO, ne’ebé realiza iha auditóriu Ministériu Finansa, Aitarak-laran, segunda ne’e.
Notísia relevante : Governu hahú ohin sesaun KRO ba OJE 2024
Pakote fiskál ne’ebé Ministériu Finansa fó ba MI hamutuk millaun $12, APC millaun $6-resin, no PNTL millaun $36.
“Bainhira ami halo ezersísiu internál ba orsamentu ne’ebé atribui, la konsege kobre hotu programa sira, entaun ami husu tan adisionál. Ho ida-ne’e mak ami tenke halo justifikasaun klaru katak tanba sá mak husu tan, ne’ebé ami husu tan osan 10% hosi tetu fiskál,” nia esplika.
Programa prioridade MI iha tinan 2024 maka haree servisu Polísia nian, kapasitasaun, reforsa seguransa iha fronteira, servisu migrasaun, prevensaun konflitu hodi hametin paz no estabilidade iha suku to’o aldeia.
Aleinde ne’e kapasita no dezenvolve Bombeiru hodi preparadu hasoru situasaun sira ne’ebé karik akontese iha tempu sira mai.
Hafoin MI no ekipa sai hosi salaun MF, ekipa SEFOPE lideradu Sekretáriu Estadu, Rogério Araújo Mendonça, tama kedas hodi halo aprezentasaun, kuaze oras ida no bainhira ramata no sai, jornalista sira hein hela iha li’úr hodi husu entrevista maibé governante ne’e rejeita ko’alia.
“Ami sei halo ajustamentu depois lori fali mai (KRO),” Rogério tenik.
Jornalista : Antónia Gusmão
Editora : Julia Chatarina
