Membru PN husu MI toma atensaun ba estabilidade seguransa rai-laran

DILI, 30 outubru 2023 (TATOLI)—Membru Parlamentu Nasionál (PN) liuhosi Deputadu Partidu Libertasaun Populár (PLP), Helder Freitas, husu Ministériu Interiór (MI) toma atensaun ba estabilidade seguransa rai-laran liuliu iha munisípiu Baucau.
Notísia Relevante: Konfrontu Gariuai, PNTL identifika no detein ona suspeitu
“Hanesan reprezentante povu, hakarak husu Ministériu Interiór (MI) toma atensaun ba estabilidade seguransa rai-laran. Labele halimar povu nia vida, tanba kestaun seguransa internál, ne’e responsabilidade MI nian. Husu ba komandante PNTL munisípiu Baucau hadi’a komunikasaun serbisu liuliu komandante PNTL eskuadra no nia membru sira, OPS, intelijénsia no autoridade lokál sira garante estabilidade iha área munisípiu Baucau,” Membru PN ne’e hato’o intervensaun liuhosi reuniaun plenária PN, segunda ne’e.
Hanesan reprezentante povu, preokupa ho estabilidade seguransa iha rai-laran liuliu ema hotu asiste eskalaun kona-ba konflitu hosi munisípiu ida ba munisípiu seluk kontinua aumenta.
“Liga ba situasaun ne’ebé akontese iha área jurídiku munisípiu Baucau, ha’u iha evidénsia. Povu presiza hakmatek, parte seguransa hatudu nia kapasidade hodi fó solusaun ba konflitu liuliu Ministéiru Interiór ho Diretór Intelejénsia Nasionál nian. Tanba de’it iha fallansu komunikasaun no koordenasaun seguransa nian até agora konflitu kontinua aumenta,” nia dehan.
Deputadu hosi bankada opozisaun ne’e hateten, akontese konfrontu iha suku Gariuai, postu administrative Baucau Vila, muisípiu Baucau, iha 24 outubru ne’e, kuaze tuku 18h00 ne’e grupu balun sunu motorizada ida, estraga komuidade nia uma inklui joven balun hetan kanek.
Aleinde ne’e, akontes em’os iha suku Caibada iha kinta-feira kalan semana kotuk ne’e rezulta uma tolu hetan estragu no populasaun la hakmatek ho sira-nia uma kala-kalan tanba grupu balun kontinua tuda malu.
La’ós ne’e de’ it maibé akontesimentu hanesan akontese mós iha suku Afaça, postu administrative Quelicai, munisípiu Baucau, iha loron 27 outubru ne’e mós hanesan estraga komunidade nia uma no motorizada, no to’o agora populasaun kontinua la hakmatek hala’o atividade tanba taka dalan no kontinua ameasa malu.
Natoon iha eleisaun suku ne’ebé raliza iha l28 outubru ne’e, nafatin iha suku Gariuai, iha lorokraik ne’e akontese entre joven estraga motorizada no komunidade nia uma, nune’e iha prosesu kontajen votu eleisaun suku iha tuku 20h00 kalan ne’e, komunidade simu gas lakrimuzeñu no estraga komunidade nia uma, tanba fallansu hosi seguransa no kontajen votu ne’e ramata iha tuku 0h:00 madrugada.
Nune’e mós, Deputada hosi bankada FRETILIN, Helena Martins, preokupa ho situasaun seguransa iha Baucau.
“Seguransa ne’ebé la’o iha territóriu laran, liuliu iha Baucau atu tama ona ba períodu eleisaun komunitária to’o eleisaun, Baucau mosu fatin-fatin mosu akotensimentu inseguransa tebes. PNTL sira mós labele kobre iha fatin sira-ne’ebé halo disturbu, tanba ne’e husu oinsá haree situasaun ne’e,” nia hateten.
Deputadu CNRT, Gabriel Soares, sekunda ho kestaun seguransa liuliu iha munisípiu Manatuto mós hanesan, iha 26 outubru kalan iha tuku 01h00 kalan akontese grupu balun mosu konfrontu sunu tiha komunidade kbiit laek ida ida-nia uma iha suku Cribas, nune’e husu parte kompetente atu investiga oknum sira-ne’ebé laiha responsabilidade ne’e.
Prezidente Komisaun B trata asuntu Negósiu Estranjeiru no Defeza ho Seguransa no Deputadu hosi bankada CNRT, Domingos Agosto ‘Deker’, apela ba sidadaun hotu iha ambitu komemora loron finadu ho hakmatek hotu-hotu kontribui ba pás no estabilidade.
Nia rekomenda ba MI liuliu komandu PNTL, prepara ekipa rezerva hodi halo patrollamentu hodi garante seguransa ba populasaun.
Jornalista : Nelson de Sousa
Editór : Cancio Ximenes

