BAUCAU, 25 outubru 2023 (TATOLI)– Kazu konfrontu ne’ebé suspeitadu komete hosi membru grupu arté marsiál hosi Persaudaraan Setia Hati Terate (PSHT) ho Ikatan Kera Sakti Putra Timor-Leste (IKS-PTL) hodi akontese tuda malu iha área dalan ba aldeia Maucale nune’e rezulta motor tipu Megapro hetan sunu.
PNTL rasik bolu kedas vítima nain-ida inisiál CB hodi husu informasaun kona-ba kazu konfruntu refere no kontinua identifika no detein tan suspeitu na’in-rua iha komandu munisípiu ho inisiál JF idade 24 no JB idade 21.
“Ita hein prosesu ba oin,” Komandante PNTL munisípiu Baucau, Superintendente xefi, Antoninho Mauluta, hateten iha Vila nova, kuarta ne’e.
Kazu refere, alende ne’e motor sunu rezulta mós uma komunidade balun rahun nune’e parte PNTL kontinua halo patrulla iha fatin akontesimentu inkliu halo investigasaun antes rejista iha Ministériu Publiku.
Kronolojia, tuir Komandante Polísia Nasionál Timor-Leste (PNTL) munisípiu Baucau, Superintendente xefi, Antoninho Mauluta, akontese iha orseik purvolta oras 6:00 resin OTL loron-tersa, 24 outubru bainhira familia balun partisipa prosesu funebre iha semiteiru Gariuai.
“Ita hetan informasaun orienta kedas ita-nia polísia eskuadra no task force to’o iha fatin akontesementu maibé situasaun grave entaun ita husu apoia tan BOP inklui komponente terrestre Falintil-FDTL,” Komandante PNTL munisípiu Baucau ne’e haktuir.
Notísia relevante:Horta alerta PNTL tenke buka tuir joven ne’ebé mak lakohi pás
Jornalista : Natalino Belo
Editór : Rafael Ximenes de A. Belo
