Horta alerta PNTL tenke buka tuir joven ne’ebé mak lakohi pás
DILI, 23 outubru 2023 (TATOLI) – Prezidente Repúblika José Ramos Horta fó apelu ba Polísia Nasionál Timor-Leste (PNTL) atu buka tuir joven sira ne’ebé lakohi kontribui ba pás iha rai-laran.
“Polísia tenke buka tuir kriminozu sira hodi kaer hotu, hatama sira ba komarka ne’ebá, nasaun ne’e ema presiza hakmatek, la’os halo barullu hodi impede ema seluk nia movimentu”, PR Horta ba jornalista sira iha Palásiu Prezidensiál, segunda ne’e.
Horta husu ba PNTL katak tenke buka tuir no kaer hotu joven hirak ne’ebé la gosta pás iha nasaun ne’e, atu nasaun ne’e labele iha tan konflitu.
Aleinde ne’e, Horta mós louva servisu autoridade polisiál nian ne’ebé halo atuasaun ba konflitu ho profisionál.
“Ha’u kontente tebes ho PNTL nia servisu ne’ebé di’ak tebes, halo intervensaun másima tebes ba konsflitu ne’ebé akontese iha Viqueque, Covalima, Dili laran no seluk tan, kontinua halo servisu hanesan ne’e”, nia revela.
Rekorda fali katak semana kotuk joven sira iha Munisípiu Covalima hamosu konflitu hodi rezulta joven ida lakon vida no iha Viqueque joven sira ataka malu hodi rezulta komunidade nia sasan balu hetan estragu.
Notísia relevante : PNTL detein suspeitu na’in-rua ba kazu omisídiu iha Tilomar
PNTL detein ona suspeitu na’in-rua hosi konfrontu Uatulari-Viqueque
Jornalista: Hortencio Sanchez
Editór : Zezito Silva
