DILI, 30 outubru 2023 (TATOLI)—Ministériu Petróleu no Rekursu Minerál (MPRM), hamutuk ho entidade tutela sira, halo aprezentasaun orsamentu ba tinan 2024 iha reuniaun Komité Revizaun Orsamentu (KRO).
MPRM iha programa prioridade lima iha tinan 2024 mak hanesan funsionamentu no dezenvolvimentu institusionál, dezenvolvimentu kampu greater sunrise no asegura katak gazotudu mai Timor-Leste, implementasaun projetu tasi mane iha kosta súl, explora, investiga no dezenvolve rekursu petrolífera, minerál no jeolójiku, dezenvolve polítika no prátika di’ak iha indústria hodi assegura partisipasaun másima timor-oan sira.
Enkuantu, liga ho programa IX Governu ba setór petróleu no minerál, aumenta valór rekuru naturál Timor-Leste ba bem estar ekonómiku populasaun, inklui maximiza reseita ho forma transparente liuhosi atividade upstream no downstream asosiada no diversfiika indústria petrolífera Timor-Leste liuhosi implementasaun projetu tasi mane iha kosta súl no investe iha formasaun rekursu umanu iha área petróleu.
“Ami mai atende de’it konvite hosi KRO ne’ebé lidera hosi Primeiru-Ministru, ministériu hotu aprezenta ninia proposta orsamentu bazeia ba programa, entaun Ministériu Petróleu no Rekursu Minerál no entidade tutela mai atubele hato’o programa no esplika tanba sá maka ministériu no instutuisaun sira husu orsamentu ida hanesan ne’e, no nia prioridade ba saida,” Ministru Petróleu no Rekursu Minerál, Francisco da Costa Monteiro, hateten hafoin halo aprezentasaun orsamentu 2024 iha auditóriu Ministériu Finansa, Aitarak-laran, segunda ne’e.
Notísia relevante : Estudu Greater Sunrise: TL-Austrália no Woodside sei aborda tan dokumentu tolu
Primeiru-Ministru, Kay Rala Xanana Gusmão, husu atu foku ba tinan 2024, ne’ebé MPRM tau prioridade dahuluk atu halo negosiasaun asegura kadoras greater sunrise mai iha Timor.
“Tanba sei iha prosesu diskusaun hela ba proposta orsamentu, ha’u hanoin di’ak liu montante ne’e labele publika lai tanba hafoin KRO tetu tiha hotu, haree tiha méritu ba orsamentu ida-idak sei lori ba aprova iha Konsellu Ministru molok submete ba Parlametu Nasionál. Iha diskusaun bainhira dokumentu ne’e formál ona maka ami ko’alia orsamentu loloos, ne’ebé daudaun ha’u evita hela atu temi númeru loloos. Ami laiha adisionál, tanba ami simu alokasaun hosi Ministériu Finansa ami reerganiza no halo ezersísiu, entaun nafatin de’it”, nia tenik.
Tuir dadus ne’ebé Agência Tatoli asesu katak, pakote fiskál ne’ebé Ministériu Finansa atribui ba MPRM inklui instituisaun tutela hamutuk millaun $60-resin iha OJE 2024.
Jornalista : Antónia Gusmão
Editora : Julia Chatarina
