DILI, 30 outubru 2023 (TATOLI)—Ministru Petróleu no Rekursu Minerál, Francisco da Costa Monteiro, hateten, Timor-Leste reprezenta hosi Timor GAP, E.P, Autoridade Nasionál Petróleu hamutuk ho konsórsiu projetu kampu petrolíferu Greater Sunrise sira hahú ona negosiasaun ba konseitu dezenvolvimentu.
Negosiasaun ne’e hahú ona iha semana kotuk iha fulan-outubru ne’e ni laran, iha Cambera, Austrália.
“Neste momentu, ha’u haree pozitivu tebes, iha vontade di’ak hosi parte hotu hodi dudu prosesu ne’e ba oin lalais, detallu kona-ba negosiasaun ne’e ami labele revela tanba ne’e prosesu negosiasaun ida. Maibé ha’u bele dehan de’it prosesu la’o di’ak hela,” Ministru dehan hafoin halo aprezentasaun orsamentu 2024 iha reuniaun Komité Revizaun Orsamentu (KRO), iha auditóriu Ministériu Finansa, Aitarak-laran, segunda ne’e.
Aleinde ne’e, Austrália no empreza sira aseita ona roteiru enkontru tuir mai, inklui ninia loron no fatin realizasaun, ne’ebé planu sira ne’e trasa ona to’o janeiru tinan 2024
Notísia relevante : Governu realiza hikas negosiasaun dezenvolvimentu Greater Sunrise iha fulan-outubru
Iha mandatu VIII Governu Konstitusionál suspende negosiasaun tanba iha dezintendimentu entre empreza konsórsiu sira.
Governante ne’e akresenta, Governu halo hela ezersísiu ba estudu viabilidade sira iha kontestu Timor-Leste, ne’ebé negosia hela ho Austrália no empreza operadór Greater Sunrise nian.
“Ita atu konvense malu hanesan Timor-Leste, Austrália no empreza presiza iha estudu ida konjuntamente, transparantemente, tau dokumentu hotu iha meza leten no analiza didi’ak hodi nune’e ita bele to’o iha konkluzaun ida konjuntamente ho Austrália no join venture sira ne’e ba oin ne’e oinsá,” nia tenik.
Governante ne’e konfirma katak orsamentu ba estudu ne’e la inklui iha orsamentu MPRM ba tinan 2024.
“Klaru katak negosiasaun sei iha implikasaun orsamentu lubuk ida, hosi parte Timor nian iha kontestu atu dezenvolve projetu tasi-mane nian sei presiza halo estudu no verifika dezeñu sei la’o nafatin,” nia salienta.
Jornalista : Antónia Gusmão
Editora : Julia Chatarina
