iklan

MUNISÍPIU, SEGURANSA, VIQUEQUE

PNTL Viqueque la rejista krime iha sentru votasaun durante eleisaun órgaun suku

VIQUEQUE, 30 outubru 2023 (TATOLI)Polísia Nasionál Timor-Leste (PNTL) munisípiu Viqueque la rejista krime iha postu lima durante eleisaun órgaun suku iha loron 28 outubru 2023.

“Hahú hosi distribuisaun materiál sensitivu no la sensitivu ba fatin votasaun to’o dadeer votasaun, laiha krime ruma mosu iha fatin votasaun to’o ramata. Depois votasaun ramata halo kontajen iha fatin votasaun,  situasaun hakmatek no laiha barullu,” Komandante PNTL munisípiu Viqueque, Superentendente, João da Costa, informa ba Agência Tatoli, iha ninia knaar fatin, Beskem, segunda ne’e.

Notísia relevante : PNTL Viqueque sei asegura Eleisaun Suku

Iha akontesimentu ida iha loron 27 outubru kalan iha suku Afaloikai, postu Uatulari, maibé la’ós iha fatin sentru votasaun, iha serimónia privadu ida, nune’e Polísia halo kedas atuasaun hodi hakalma situasaun.

João dehan, prosesu eleisaun tarde ba postu lima ho sentru votasaun 230 tanba eleitór barak maibé kabina votu ida de’it. Tanba, ne’e mak presiza lori tempu naruk mak foin hotu.

“Situasaun durante eleisaun la’o di’ak, maibé buat ne’ebé ami nota maka prosesu eleisaun maka la’o kleur to’o kalan boot maka foin kontajen hotu,” nia relata.

Antes ne’e, PNTL koloka membru hamutuk 136. Apoia PNTL 44, Unidade Espesiál na’in-12 no Batallaun Orden Públiku (BOP) na’in-10.

Jornalista     : Vitorino Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!