VIQUEQUE, 31 outubru 2023 (TATOLI)—Administradór postu Uatulari, munisípiu Viqueque, Manuel do Rosário, halo ona koordenasaun ho Xefe suku Afaloikai no Macadique atu rezolve konfrontu ne’ebé akontese iha postu Uatulari, iha loron 21 outubru 2023.
“Ha’u halo ona koordenasaun ho Xefe suku na’in-rua, nune’e bainhira eleisaun órgaun suku hotu mak tuur hamutuk hodi rezolve tuir família ida iha postu Uatulari,” Manuel do Rosário, hateten ba Agência Tatoli, iha postu Uatulari, tersa ne’e.
Notísia relevante : Konfrontu Uatulari uma hitu estragu no asegura suspeitu na’in-lima
Autoridade postu husu Uatulari-oan sira atu hamutuk no labele kria beibeik problema-
“Ita presiza kria pás ne’e di’ak liu, atu ita mós bele kontribui ba prosesu dezenvolvimentu. Se kria problema, ita sei la manán buat ida. Nune’e, ha’u husu ba joven Uatulari tenke kria pás no unidade iha ita-nia postu ida-ne’e,” nia hameno.
Antes ne’e, akontese konfrontu entre suku Afaloikai no suku Macadique, iha Uatulari, iha loron sábadu (21/10) maizumenus tuku 16:00 lorokraik hodi rezulta ema na’in-10 hetan kanek inklui membru Polísia na’in-rua. Aleinde ne’e, rezulta karreta patrullamentu Polísia hetan tuda no kareta truk ida vidru oin rahun.
Nune’e, Polísia Nasionál Timor-Leste (PNTL) detein ona suspeitu na’in-neen no aprezenta ona ba Ministériu Públiku (MP) hodi hein notifikasaun.
Jornalista : Vitorino Lopes da Costa
Editora : Julia Chatarina
