CNE Covalima husu aumenta pesoál rejista lista eleitór iha segunda ronda
COVALIMA, 31 Outubru 2023 (TATOLI)—Komisaun Nasionál ba Eleisaun (CNE-sigla portugés) husu ba Governu atu realiza eleisaun xefe suku ba segunda ronda tne’e enke aumenta pesoál atu rejista lista eleitór sira-nia naran atu ezerse direitu votu iha eleisaun suku.
Notísia Relevante: Kandidatu xefe suku 251 sei avansa ba eleisaun segunda ronda
“Ami haree buat balun presiza aumenta hanesan rekrutamentu pesoál ne’ebé halo atendimentu hodi rejista eleitór nia naran. Realizasaun eleisaun suku ida-ne’e ita uza manuál, tanba STAE la emprime lista votante, nune’e ita lahatene eleitór ne’ebé vota no la tuir vota,” Diretór CNE Covalima, Hermenegildo de Sena, hateten ba Agência Tatoli iha nia kna’ar fatin, Tabakolot, tersa ne’e.
Nia halo komparasaun, maske eleisaun suku iha 2023 ne’e atendimentu uza de’it sistema manuál maibé realiza eleisaun suku ida-ne’e di’ak-liu, tanba fó oportunidade ba STAE-CNE atu halo sensibilizasaun lala’ok eleisaun ba eleitór sira iha área rurál.
Eleisaun suku iha tinan 2016 ne’e, eleitór sira lahatene buletin votu atu ba vota mak foin hatene buletin votu xefe aldeia, delgada no delgadu tanba laiha tempu ba STAE-CNE atu halo sensibilizasaun lala’ok eleisaun suku ba eleitór sira.
“Eleisaun líder komunitária ba tinan ne’e halo atendimentu uza manuál. Ita kompara ho realiza suku iha tinan 2016, eleisaun suku ba tinan 2023 di’ak-liu tanba CNE-STAE hola nia responsabilidade pesoál hosi Ministériu Administrasaun Estatál,” nia hateten.
Durente realiza eleisaun suku iha munisípiu Covalima CNE la identifika mosu irregularidade, maibé presiza atu hadi’a lei no matadalan tanba la tau delgada ho delgaladu nia fotografia iha buletin votu fó impaktu ba ferik katuas sira atu vota.
Abitante Vitorino Sequeira Magno hateten, Governu realiza eleisaun ba líder komunitária la’o ho di’ak no tuir demokrásia maibé ladún prepara kondisaun ho di’ak, tanba durante realiza eleisaun mosu fallansu sira hanesan pesoál atendimentu rejista eleitór nia naran hakerek de’it ho liman no buletin votu ba xefe aldeia sira la uza fotografia no hakerek de’it naran, entaun oinsá ba katuas ho ferik lahatene lee no hakerek entaun naran vota de’it
“Ha’u dehan Governu prepara kondisaun ladún di’ak, tanba ami identifika fallansu sira hanesan pesoál meza eleitorál halo atendimentu hakerek ho liman, tanbasá ita la uza lista votante eleisaun prezidensiál no eleisaun parlamentár ne’e,” nia dehan.
Bazeia ba rezultadu hosi eleisaun suku iha suku 30 ne’e, postu administrativu hitu hatudu katak kandidatu xefe suku na’in-neen (6) eleitu ona iha eleisaun primeira volta no kandidatu xefe suku 24 mak sei compete dala id atan iha eleiaun segunda volta.
Notísia Relevante: Kandidatu xefe suku 6 iha Covalima eleitu iha primeira volta
Jornalista : Celestina Teles
Editór : Cancio Ximenes
