Deputadu CNRT husu hadi’a mekanizmu eleisaun suku iha segunda ronda
DILI, 31 outubru 2023 (TATOLI)—Deputadu hosi bankada CNRT iha Parlamentu Nasionál (PN), Luis Caldeira, husu Sekretáriadu Tékniku Administrasaun Eleitorál ho autoridade munisípiu no postu aministrativu sira atu hadi’a mekanizmu eleisaun suku iha segunda ronda.
Notísia Relevante: Eleisaun suku ho sistema manuál, MAE sei hadi’a iha segunda ronda
Deputadu Luis Caldeira felisita povu Timor-Leste tomak ne’ebé ho susesu hala’o tiha ona eleitór sira-nia lideransa komunitáriu ne’ebé ho fallansu, maibé bele eleitu ona sira-nia líder iha suku,
Nia felisita mós brigada sira-ne’ebé ho rekursu menus maibé sira bele hala’o serbisu loron tomak no balun to’o dadeersan madrugada buat hotu ho di’ak, no membru PNTL garante seguransa ba eleitór sira.
“Iha eleisaun ida-ne’e ita bele dehan loos duni iha istória Timor-Leste foin mak ladun di’ak, maibé ne’e fallansu hosi ne’ebé. Ministériu Administrasaun Estatál (MAE) hala’o de’it desizaun, ezekutadór no implementadór ne’e iha STAE no autoridade iha munisípiu no postu. Tanbasá labele prepara kondisaun ho di’ak. Tanbasá resensiamentu tenke halo fali iha sentru votasaun. Livru ne’ebé ita uza iha eleisaun jerál ne’e ba tiha ne’ebé mak rejistu manuál fali. Ida-ne’e mak fó impaktu hodi halo ita-nia eleitór sira antrian iha sentru votasaun, tanba ne’e tenke hadia duni,” Deputadu ne’e hato’o liuhosi intervensaun iha plenária PN, tersa ne’e.
Nia konsidera, fallansu ida-ne’e hosi STAE no autoridade munisípiu ho postu sira la akompaña prosesu ne’e halo didi’ak no fó tomak todan ne’e ba brigada sira, nune’e mosu eleitór sira forma kle’ur iha sentru votasaun.
Nu’udar reprezentante povu iha fukun PN, nia hakarak husu deskulpa ho situasaun ne’e ba povu tomak no ba oin atu labele akontese tan, nune’e rekomenda ba eleisaun segunda ronda mai iha suku balun STAE tenke prepara kondisaun ida-ne’ebé di’ak-liu.
Hanesan livru rejistu ne’ebé iha tenke utiliza labele halo rejistu manuál iha fatin hodi difikulta eleitór sira hodi hala’o sira-nia kna’ar ka devér atu hili lideransa komunitária.
“Aumenta mós material la’ós sensitivu eleisaun urna no kabina votu ne’e autoridade tenke akompaña. Nune’e, prosesu eleisaun segunda ronda labele iha tan fallansu,” nia dehan.
Jornalista : Nelson de Sousa
Editór : Cancio Ximenes
