DILI, 31 outubru 2023 (TATOLI) – Ministériu Edukasaun (ME) simu ona relatóriu husi edukasaun munisipál sira kona-ba rezultadu ezame nasionál ne’ebé realiza ona iha loron 16 outubru liubá. Relatóriu ne’e hatudu katak estudante finalista hamutuk 113 maka sei hetan oportunidade hodi tuir fali ezame segunda xamada.
Sekretáriu Estadu Edukasaun Ensinu Sekundáriu no Eskola Téknika, Domingos Lopes Lemos, hatete alunu 113 ne’ebé tuir fali ezame segunda xamada ne’e mai husi eskola bázika na’in-33, sekundária 69 no tékniku vokasionál 11.
Tuir kalendáriu, ezame segunda xamada sei akontese entre loron 06 no 07 novembru. Tanba ne’e, Ministériu Edukasaun husu ba kada estudante sira ne’ebé hetan fali oportunidade iha ne’e atu prepara aan, liuliu sira-nian saúde hodi realiza fali ezame refere.
“Tanba oportunidade ne’e ikus ona ba estudante sira iha segunda xamada ne’e. Karik husi loron ne’ebé determina ona maka iha estudante balun labele realiza ne’e responsabilidade ida-idak nia. Ne’e duni, estudante na’in-113 tenke tau atensaun atu labele falla iha oportunidade ikus ne’e”, governante dehan iha Vila Verde, ohin.
Iha okaziaun ida ne’e, Domigos Lemos adianta katak ezame nasionál ba tinan ida ne’e la garante atu alunu sira aprovadu 100%, maibé se ida ne’e mak akontese duni signifika estudante sira iha duni preparasaun ne’ebé di’ak.
Nia relembra katak, durante tinan barak, korresaun pontu ezame sira la’ós uza manuál maibé dijitál ona no laiha manipulasaun ida ba rezultadu korresaun sira. Nune’e, nia husu ba públiku atu labele iha pensamentu ida katak rezultadu ezame nasionál ne’e tenke 100%.
Sorin seluk, Koordenadór Gabinete Unidade Kurríkulu Nasionál, João Maupelu, informa katak korresaun pontu ezame hahú ohin, 31 outubru, no tuir planu sei finaliza iha novembru no data tentativa atu anunsia rezultadu ezame nasionál sei monu iha loron 4 dezembru 2023.
Husi prosesu verifikasaun pontu ezame ne’ebé realiza ona ne’e, tuir esplikasaun koordenadór Maupelu, hahú uluk ho identifikasaun lista prezensa no folla resposta sira, nune’e bele halo ajustamentu ho didi’ak.
Bainhira prosesu ajustamentu hotu ona maka parte ekipa verifikadora sira informa ba ekipa téknika ne’ebé kaer baze dadus katak bele halo ona korresaun ba pontu ezame sira bazeia ba eskola refere no tuir númeru eskola ne’ebé termina ona, nune’e nia prosesu la’o to’o korresaun remata.
Notísia relevante: ME halo ona verifikasaun ba pontu ezame nasionál husi kada munisípiu
Jornalista: Tomé Amado
Editora: Maria Auxiliadora
