DILI, 31 outubru 2023 (TATOLI)–Ministru Komérsiu no Indústria, Filipus Nino Pereira, tersa ne’e, tun direta ba estabelesimentu retallu foos sira iha Dili laran, ne’ebé hetan subsídiu hosi Governu hodi fa’an foos ho presu normál ba populasaun.
“Empreza importadora sira maka fa’an foos ho marka ne’ebé termina ona hanesan Perissos fa’an foos ho marka Amor da Família ho Globus. Enkuantu, empreza Kreative Furak fa’an foos ho marka Beruang Merah ho Tali Merah. Ami husu ba loja sira ne’ebé sosa tutan hosi empreza importadora sira, katak foos ho marka Amor da Familia mak stoke hotu, ne’ebé ami nafatin buka meiu hodi kontrola hela presu iha merkadu tanba haree mós ba kuantidade stoke iha empreza fornesedora sira,” Ministru Nino Pereira, hateten iha ámbitu inspesaun ba retallu, loja Abdul Kader Enterprise, Unipesoal, Lda, iha Becora.
Ministru Nino Pereira halo inpesaun iha loja Abdul Kader Enterprise, Unipesoal, Lda iha Becora, Mei Martiha Fatuhada, no kontinua ba loja sira iha munisípiu Liquiçá.
Ekipa regulasaun komersiál hosi Ministériu Komérsiu Indústria (MKI) daudaun ne’e halo kontrolu to’o munisípiu tanba iha ne’ebá foos hosi subsídiu sirkula to’o ona postu administrativu sira.
Notísia relevante : Governu koordena empreza importadór normaliza presu foos
Hafoin asina kontratu ho Governu, empreza imprtadór hanesan Perissos fa’an ona foos ba rede distribuidór no loja sira (retallu) hamutuk saka 50.000 ka tonelada 1.600, enkuantu Kreativu Furak pur volta saku rihun 45 ka tonelada 400.
“Daudaun empreza imprtadora rua mak kumpre ona kontratu hodi fa’an foos tuir subsídiu ne’ebé Governu atribui ba sira. Empreza tolu ita hein de’it, hanesan Lisun sira sei hein foos importadór ne’ebé semana ida-ne’e mak foin atu tama. Sira garantia katak stoke foos ne’ebé sei mai ne’e bele to’o fulan-neen,” nia tenik.
Ministru Prezidénsia Konsellu Ministru, Agio Pereira, hanesan Ministru Koordenadór Asuntu Ekonómikus ein ezersísiu, asina ona akordu lima ho empreza importadora ai-han hodi implementa intervensaun temporária ba estabilizasaun folin foos iha merkadu, ne’ebé serimónia ne’e hala’o iha Palásiu Governu.
Akordu hirak ne’ebé selebra ona, ninia objetivu atu asegura presu foos importadu, ne’ebé iha hela armazen nasionál no fa’an kuantidade boot, hodi fiksa ho montante másimu $12 ba kada saku ka parsela kilograma 25 atu permite fa’an rahun foos ho folin másimu $ 0,50 kada kilograma.
Nune’e, hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór $5 kada saku ka parsela kilograma 25, ne’ebé korresponde ho sentavu 20 ba kada kilograma foos.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei n. 76/2023, loron 29 setembru, ne’ebé estabelese medida ida-ne’e.
Empreza lima ne’ebé ohin formaliza ona akordu ho Governu maka, Perissos Victoria Lda, Loja Creative Furak Lda, Lisun Importação no Exportação Lda., Jusibel Unipessoal Lda no Alfa Dili Unipessoal Lda.
Jornalista : Antónia Gusmão
Editora : Julia Chataraina
